Qyteti i Mitrovicës ka kaluar një sfidë të vështirë pas përmbytjeve të shkaktuara nga reshjet e mëdha të shiut dhe dalja nga shtrati e lumit Sitnica. Megjithatë, gjendja në orët e fundit ka filluar të përmirësohet.
Një gjë të tillë e ka konfirmuar edhe kryetari i komunës së Mitrovicës së Jugut, Faton Peci.
“E kaluam edhe këtë sfidë, bashkë. Pas përmbytjeve të shkaktuara nga lumi Sitnica, gjendja ka filluar të përmirësohet. Megjithatë, pasojat na kujtojnë sa e rëndësishme është të jemi pranë njëri-tjetrit në momente të vështira, si njerëz dhe si institucione”, ka shkruar Peci në Facebook.
Ai tutje ka falënderuar Shtabin Emergjent, të përbërë nga përfaqësues të institucioneve lokale dhe qendrore, dhe çdo vullnetar që, siç tha, pa u kursyer dha kontributin e tij, po ashtu shoqatatat, kompanitë, grupe të organizuara dhe qytetarët, të cilët i vlerësoi me zemër të madhe.
“Të bashkuar për Mitrovicën, në kohë të vështira dhe në ditë të mira”, ka shtuar Peci.
