Ushtarë gjermanë nga Komanda Rajonale-Lindje e misionit të KFOR-it kanë realizuar një trajnim të specializuar për Sistemet Kundër Mjeteve Ajrore pa Pilot (C-UAS), me qëllim rritjen e kapaciteteve për zbulimin dhe neutralizimin e dronëve.
“Trajnimi u fokusua në përdorimin e teknologjive më moderne kundër dronëve, duke përmirësuar aftësitë teknike të pjesëtarëve të KFOR-it dhe njëkohësisht duke forcuar bashkëpunimin, koordinimin dhe punën ekipore në një ambient shumëkombësh”, thuhet në njoftim.
Sipas KFOR-it, trajnime të tilla janë thelbësore për ruajtjen e gatishmërisë dhe efektivitetit operacional të misionit, në funksion të garantimit të një mjedisi të sigurt dhe të qëndrueshëm për të gjithë qytetarët e Kosovës.
KFOR-i rithekson se vazhdon zbatimin e mandatit të tij , duke siguruar lirinë e lëvizjes dhe stabilitetin në vend. KFOR bashkëpunon ngushtë me Policinë e Kosovës dhe EULEX-in për ruajtjen e sigurisë dhe rendit publik.
