Reshje, vërshime e dëme në shtëpi e prona pati në Fushë Kosovë dhe në fshatrat përreth. Fshati Kuzmin i kësaj komune vlerësohet të jetë një ndër më të prekurit. Shumë banorë janë evakuuar dhe janë dërguar në lokacione të tjera, pasi shtëpitë e tyre janë bërë të pabanueshme për shkak të ujit që ka depërtuar në to.
Për tri ditë, pothuajse tërë vendi u përshkua nga vërshimet, duke prekur familje, biznese e duke shkaktuar dëme të mëdha materiale. Nga kjo situatë nuk shpëtoi as Fushë Kosova. Fshati Kuzmin i kësaj komune vlerësohet të jetë një ndër më të prekurit, fillimisht nga shiu e tani nga bora.
Reshjet e ditëve të fundit kanë shkaktuar vështirësi në qarkullim. Rruga në fshatin Kuzmin të Fushë Kosovës është bërë e pakalueshme për shkak të ujit që e ka mbuluar atë.
Ndërkohë, shumë banorë të këtij fshati janë evakuuar dhe janë dërguar në vende të tjera, pasi shtëpitë e tyre janë bërë të pabanueshme për shkak të ujit që ka depërtuar në to. Ndërkohë, banorët ankohen se uji ka depërtuar në bodrume, për çka po përdorin pompat për largimin e tij.
“Gjithë natën, nga mbrëmja deri në mëngjes kemi nxjerrë ujin. Është katastrofë, gjithçka më është shkatërruar në bodrum, kam pasur makina, vegla, gjithçka është nën ujë. Kjo po vazhdon tashmë tri ditë, siç shihni, bunari është mbushur me ujë dhe gjithçka ka hyrë në shtëpi. Kemi dy metra ujë brenda shtëpisë,” thotë një banor serb.
Drejtori i Shërbimeve Publike në Fushë Kosovë, Izja Mjeku, thotë se gjendja është duke u përmirësuar, derisa njoftoi se tanimë komisioni i formuar nga komuna ka filluar vlerësimin e dëmeve nga vërshimet.
“Zona e fshatrave duke filluar nga Grabovci, Bardh, Mesbardh, Pomozotin, dy Dobrevat, Henci dhe afër Bresjes. Pra, të gjitha fshatrat kanë qenë, mirëpo më i rrezikuari ka qenë fshati Kuzmin, ku është dashur t’i tërheqim shtatë familje diku të komuniteteve të cilët kanë shkuar nëpër familjarët e tyre dhe pse na kemi shpreh mundësi që t’i qojmë nëpër banesa ku ka mundësi komuna,” tha Mjeku.
Në situatë të ngjashme me Fushë Kosovën është edhe qyteti fqinj, Obiliqi. Si pasojë e sasisë së madhe të ujit të grumbulluar, rruga Obiliq-Palaj të enjten ishte e pakalueshme. Prapa kamerës, banorët thanë se në këtë rrugë kalohet vetëm me mjete të rënda, derisa për këmbësorët është e pamundur një gjë e tillë.
Kryetari i Obiliqit, Halil Thaçi, tha se edhe në këtë komunë gjendja është përmirësuar, derisa tregoi për intervenimet që kanë bërë në tri ditët e fundit.
“Ka pasur disa familje, janë mbi tetë familje që objektet e banimit i ka përfshir uji, mirëpo nuk janë evakuuar, për arsye se kanë gjetur zgjidhje të tjera. Zakonisht këtu në komunën e Obiliqit është lumi Sitnica i cili i bën dëmet më të mëdha, është lumi Llap dhe lumi Drenica, mirëpo pjesa e Sitnicës ka pasur më shumë vërshime dhe dëmet më të mëdha janë në atë pjesë. Ende është një rrugë që nuk është e kalueshme, është rruga që lidh qytetin e Obiliqit me fshatin Palaj, por po presim rënien e nivelit dhe sigurisht që do të tejkalohet edhe kjo gjendje,” tha Thaçi.
Ndërkohë, komunat kanë bërë thirrje që për shkak të reshjeve të borës dhe të shiut, qytetarët të kenë kujdes gjatë qarkullimit nëpër rrugë, si dhe t’i evitojnë daljet e panevojshme.
