Agjencia e Ushqimit dhe Veterinarisë e Kosovës (AUV) ka njoftuar se, përmes Sistemit të Alarmimit të Shpejtë për Ushqim dhe Ushqim për Kafshë (RASFF), ka pranuar një njoftim (nr. 2026.0032) lidhur me praninë e mundshme të aflatoksinës M1 në djathin Mozzarella të prodhuar nga qumështi i buallicës.
Sipas AUV-së, bazuar në vlerësimin e një rreziku të mundshëm serioz për shëndetin e konsumatorëve, janë ndërmarrë masa të menjëhershme në përputhje me procedurat e sistemit RASFF, përfshirë monitorimin e rastit dhe tërheqjen nga tregu të produkteve të dyshuara.
“Lotet e ndikuara janë: 25346, 25347, 25349 dhe 25350, me origjinë nga Italia, prodhues Caseificio Coop. “La Contadina” A.R.L., eksportues Cepparo S.P.A. Itali, ndërsa produkti është importuar në Kosovë nga Premio SHPK, Sllatinë e Madhe”, thuhet në njoftim.
Agjencia e Ushqimit dhe Veterinarisë ka bërë të ditur se do të vazhdojë monitorimin e vazhdueshëm të tregut dhe zinxhirit ushqimor, duke zbatuar masa parandaluese dhe kontrolluese, me qëllim që konsumatorëve në Republikën e Kosovës t’u sigurohet ushqim i sigurt, i shëndetshëm dhe në përputhje me standardet kombëtare dhe ndërkombëtare të sigurisë ushqimore.
