Këshilli Gjyqësor i Kosovës, thotë se miratimi i Udhëzimit Administrativ për Taksat Gjyqësore është bërë në përputhje të plotë me legjislacionin në fuqi dhe në përmbushje të mandatit kushtetues dhe ligjor të Këshillit.
Sipas tyre, ky rregullim ka për qëllim garantimin e qasjes efektive në drejtësi, përmes lirimit nga pagesa e taksave gjyqësore të kategorive që, për shkak të rrethanave sociale, ekonomike apo statusit të veçantë, gëzojnë mbrojtje të shtuar, me përjashtim të çështjeve me karakter monetar.
“Lirimi nga pagesa e taksave është paraparë si përgjigje ndaj rrethanave sociale, ekonomike dhe statusit të veçantë të personave që duhet të gëzojnë mbrojtje të shtuar, por edhe si masë balancuese ndaj rregullimit të tarifave, në përputhje me standardin jetësor në Kosovë”, thotë KGJK-ja.
Kanë treguar se në kuadër të kategorisë së personave, nga pagesa e taksave gjyqësore janë liruar nga taksat: shfrytëzuesit e asistencës sociale, familjet e dëshmorëve dhe të personave të zhdukur gjatë luftës, invalidët dhe veteranët e luftës, familjet e viktimave civile të luftës, viktimat e dhunës seksuale gjatë luftës, personat me aftësi të kufizuara, përfshirë personat paraplegjikë, tetraplegjikë dhe personat e verbër, si dhe personat që gëzojnë të drejtën për ndihmë juridike falas.
Po ashtu, thonë se nga pagesa e taksave gjyqësore lirohen institucionet shtetërore, si dhe personat në gjendje të rëndë ekonomike, të cilët dëshmojnë se pagesa e taksës do të rrezikonte drejtpërdrejt ekzistencën e tyre ose të familjes.
KGJK thotë se udhëzimi ka liruar nga taksat gjyqësore gjithsejtë 26 parashtresa të liruara nga pagesa, ku krahasuar me udhëzimin e mëparshëm janë shtuar edhe 17 parashtresa të reja.
Kanë theksuar se ky Udhëzim Administrativ është hartuar në përputhje me parimet e transparencës dhe llogaridhënies dhe pas një procesi të rregullt dhe gjithëpërfshirës të konsultimit publik, i cili është zhvilluar në dy faza.
KGJK-ja thotë se që nga viti 2017 nuk ka pasur asnjë ndryshim në taksat gjyqësore, pavarësisht ndryshimeve të theksuara në standardin jetësor, zhvillimeve ekonomike dhe rritjes së kostove të sistemit gjyqësor.
Kanë sqaruar se taksat gjyqësore të përcaktuara me këtë udhëzim derdhen në buxhetin e Republikës dhe nuk përbëjnë të hyra të drejtpërdrejta për KGJK-në apo për gjykatat.
KGJK thotë se nuk qëndrojnë pretendimet se taksat gjyqësore janë rritur në mënyrë të ndjeshme dhe kanë për qëllim zvogëlimin e numrit të lëndëve në gjykata, përkundrazi, sipas tyre, është zgjeruar ndjeshëm lista e kategorive të liruara nga pagesa.
