Mediat amerikane kanë publikuar pamje që japin informacion mbi momentet që çuan në të shtënat në Minneapolis, ku agjenti i Imigracionit dhe Doganave (ICE), Jonathan Ross, vrau Renee Good.
Një zyrtar i Departamentit të Sigurisë Kombëtare (DHS) konfirmoi se videoja, e siguruar nga CNN , ishte regjistruar nga një kamerë në telefonin celular të agjentit. Videoja u sigurua fillimisht nga media konservatore e Minesotës, Alpha News.
“Shikojeni këtë, sado e vështirë që është. Shumë prej jush kanë dëgjuar se ky oficer policie nuk u godit nga një makinë, nuk u ngacmua dhe vrau një grua të pafajshme. Realiteti është se jeta e tij ishte në rrezik dhe ai qëlloi për vetëmbrojtje”, shkroi Vance.
Çfarë mund të shihet në video?
Videoja fillon me Rossin duke qëndruar përpara një automjeti të drejtuar nga Good, e cila e ka parkuar SUV-in e saj të kuq të errët pingul me rrugën, duke bllokuar trafikun. Rossi nuk thotë asgjë ndërsa ecën përpara makinës në anën e shoferit.
Ndërsa ecën përreth automjetit, Good mund të shihet duke parë drejtpërdrejt oficerin me dritaren e ulur.
Regjistrimi më pas tregon Good duke folur me Ross-in.
“S’ka gjë, vëlla. Nuk jam e zemëruar me ty,” thotë ajo. Rosi nuk përgjigjet. Pasqyrimi i tij mund të shihet në xhamin e makinës ndërsa mban telefonin dhe vazhdon të ecë. Zëri i Becca Good , gruas së viktimës, mund të dëgjohet në sfond, duke i thënë Rosit “Tregoje fytyrën tënde”.Videoja tregon Rossin duke ecur drejt pjesës së pasme të makinës. Becca Good, e cila ishte pasagjere dhe kishte dalë nga automjeti para konfrontimit, i thotë Rossit: “Ne nuk i ndërrojmë targat çdo mëngjes, vetëm që ta dish. Kjo do të jetë e njëjta targë kur të vish tek ne më vonë.”
Ndërsa flet me të, ajo ia mban celularin para fytyrës.
“Do të na sulmosh? Do të na sulmosh? Po të them, shko merr drekën, djalosh i madh,” e qorton pasagjerja Rosin. Pastaj ajo përpiqet të kthehet në makinë, por dera është e kyçur.
Në atë moment, dëgjohet një tjetër oficer policie duke i bërtitur shoferit: “Dil nga makina e mallkuar”.
Pastaj, Good fillon të kthejë automjetin mbrapsht dhe, duke e kthyer timonin djathtas – larg oficerit – shikon përpara. Makina lëviz përpara, Ross bërtet “prit” dhe shumë shpejt dëgjohen tre të shtëna të njëpasnjëshme.
Videoja nuk tregon nëse SUV-i e ka goditur Rossin, sepse kamera rrotullohet drejt qiellit. Pamjet e mëparshme të dëshmitarëve okularë sugjerojnë se automjeti mund të ketë rënë në kontakt me Rossin, ndërsa papritmas është lëkundur përpara dhe ai është zhvendosur anash.
Të shtënat në vetvete nuk janë të dukshme, por dëgjohen qartë tre të shtëna ndërsa celulari në dorën e Rossit dridhet më tej dhe kthehet drejt shtëpisë pas tij.
Pastaj kamera kap një SUV që ecën përpara me shpejtësi. Në sfond, dikush mund të dëgjohet duke thënë, “Kurvë e mallkuar”.
Një zhurmë e fortë dëgjohet gjithashtu ndërsa SUV-i përplaset me një makinë të parkuar dhe kamera zhvendoset poshtë drejt rrugës, raporton CNN.
