Agjencia e Statistikave të Kosovës (ASK) ka publikuar të dhënat për Indeksin e Harmonizuar të Çmimeve të Konsumit (IHÇK) për muajin dhjetor 2025, sipas të cilave inflacioni vjetor ka arritur në 5,3 për qind, ndërsa ai mujor në 0,7 për qind.
Sipas ASK-së, norma mesatare vjetore e inflacionit për vitin 2025 ishte 3,9 për qind, krahasuar me vitin 2024. Rritja e çmimeve është vërejtur kryesisht te energjia elektrike, ushqimet bazë, mishi, produktet e qumështit, pemët, si dhe te shërbimet hoteliere dhe pushimet e organizuara.
Në krahasim me dhjetorin e vitit 2024, çmimet janë rritur më së shumti te pemët, energjia elektrike, shërbimet e transportit dhe lëndët djegëse për ngrohje. Ndërkohë, rënie e çmimeve është shënuar te karburantet dhe lubrifikantët për transportin personal.
ASK bën të ditur se krahasuar me muajin nëntor 2025, rritja mujore e inflacionit është nxitur kryesisht nga shtrenjtimi i energjisë elektrike, biletave të fluturimit dhe produkteve ushqimore, ndërsa karburantet kanë shënuar ulje të lehtë.
