Policia e Kosovës, përkatësisht Drejtoria Rajonale e Policisë në Pejë, me autorizim të Prokurorisë Themelore në Pejë, ka publikuar fotografitë dhe të dhënat e tre personave të dyshuar, të cilët janë në kërkim policor për veprën penale “Vrasje e mbetur në tentativë”, e cila ka ndodhur në Pejë.
Personat e kërkuar janë: Arian (Misin) Qelaj, i lindur më 20.06.1981 në fshatin Maznik, komuna e Deçanit; Yll (Arian) Qelaj, i lindur më 29.07.2003 në fshatin Maznik, komuna e Deçanit; Altin (Rifat) Qelaj, i lindur më 01.10.2005 në fshatin Maznik, komuna e Deçanit.
Sipas Policisë së Kosovës, të dyshuarit kërkohen në bazë të urdhëresës së Prokurorisë kompetente, ndërsa publikimi i fotografive dhe i të dhënave të tyre po bëhet me qëllim të lokalizimit dhe arrestimit të tyre.
Policia e Kosovës u bën thirrje qytetarëve të Republikës së Kosovës që, nëse kanë çfarëdo informacioni lidhur me vendndodhjen e personave të dyshuar që shihen në fotografitë e publikuara, të njoftojnë menjëherë Policinë e Kosovës ose të paraqiten në stacionin policor më të afërt.
Autoritetet policore theksojnë se çdo informacion i ofruar nga qytetarët do të trajtohet me konfidencialitet të plotë, ndërsa bashkëpunimi i qytetarëve mbetet i domosdoshëm për zbardhjen e plotë të rastit dhe vënien e të dyshuarve para drejtësisë.
Kujtojmë se tre të kërkuarit janë të dyshuar për tentim-vrasjen e Jeton Buqukut në Pejë. Ky i fundit u plagos me armë zjarri më 11 janar 2026, rreth orës 09:15, në rrugën “Adem Jashari” në Pejë.
Burimet bëjnë të ditur se, sipas deklaratave të dëshmitarëve okularë, viktima ishte futur i plagosur brenda lokalit “Buquku”, menjëherë pasi ishin dëgjuar të shtëna me armë zjarri. Pas tij, në lokal kanë hyrë tre persona: njëri prej tyre me revole në dorë, i dyti me një mjet të fortë, me të cilin e ka goditur viktimën, ndërsa i treti, sipas dëshmitarëve, ka qëndruar pranë dhe ka vëzhguar ngjarjen.
Sipas prokurorisë, tre të dyshuarit janë personat tashmë të kërkuar, Arian, Yll dhe Altin Qelaj.
