Partia Demokratike e Kosovës, ka njoftuar se sot ka mbajtur mbledhjen e Kryesisë, të dytën pas zgjedhjeve të 28 dhjetorit, ku është diskutuar analiza e procesit zgjedhor dhe rezultati elektoral.
Në këtë takim, Kryesia vlerësoi performancën e PDK-së në zgjedhje, ku partia u rendit si forca e dytë politike, duke ruajtur votën tradicionale, si dhe nxori rekomandime për hapat e ardhshëm politikë dhe organizativë.
Si hap i parë drejt forcimit të partisë, Kryesia ka vendosur të nisë përgatitjet për zgjedhjet e brendshme partiake në të gjitha nivelet, nga strukturat lokale deri te organet qendrore. Procesi pritet të fillojë në javët në vijim me formimin e grupeve punuese, me synimin për një proces demokratik, gjithëpërfshirës dhe transparent.
PDK ka theksuar se do të vazhdojë angazhimin për konsolidimin e brendshëm dhe forcimin e rolit të saj si opozitë kryesore në vend.
