Një nga propagandistët më të famshëm rusë, Vladimir Solovyov, tha në një nga emisionet e tij televizive se Rusia duhet ta shqyrtojë seriozisht “sferën e saj të ndikimit” dhe mundësinë e nisjes së të ashtuquajturave operacione të reja ushtarake speciale në Armeni dhe vendet e Azisë Qendrore. Ai e përdori termin operacion ushtarak special në të njëjtën mënyrë që Moska e përdor për të përshkruar luftën në Ukrainë që nisi në shkurt të vitit 2022, shkruan Ukrainska Pravda .
Siç shkruan Meduza, një media e pavarur ruse me seli në Letoni, Solovyov përmendi veprimet e Shteteve të Bashkuara të Amerikës në Venezuelë si shembull, duke gjykuar se ato “shkelën të drejtën ndërkombëtare”.Sipas tij, ngjarjet në Armeni janë shumë më të dhimbshme dhe domethënëse për Rusinë sesa situata në Venezuelë, duke paralajmëruar se humbja e Armenisë, si dhe destabilizimi i Azisë Qendrore, do të përfaqësonin një problem gjigant sigurie për Moskën.
Ata mendojnë se kanë të drejtë ta bëjnë këtë.
Solovyov vuri hapur në dyshim rëndësinë e së drejtës ndërkombëtare, duke pohuar se nëse Rusia do të niste një operacion ushtarak në Ukrainë për arsye sigurie kombëtare, ajo mund të ndërmerrte hapa të ngjashëm në zona të tjera që i konsideron pjesë të sferës së saj të ndikimit.Ministria e Jashtme armene reagoi ndaj deklaratave të tij duke i dërguar një notë proteste ambasadorit rus në Jerevan. Ajo shprehu “indinjatim të thellë” për komentet e bëra në emisionin televiziv shtetëror rus, me mesazhin se deklarata të tilla janë të papajtueshme me marrëdhëniet miqësore midis Armenisë dhe Rusisë.
Deklaratat e Solovyov vijnë në një moment të ndjeshëm për rajonin, pasi Armenia dhe Azerbajxhani, me ndërmjetësimin e Shteteve të Bashkuara të Amerikës, nënshkruan një marrëveshje paqeje.
Marrëveshja u nënshkrua më 8 gusht në Shtëpinë e Bardhë nga Presidenti i Azerbajxhanit Ilham Aliyev dhe Kryeministri i Armenisë Nikol Pashinyan , në prani të Presidentit të SHBA-së Donald Trump , dhe përfshin krijimin e një korridori tranziti të quajtur “Rruga Trump për Paqe dhe Prosperitet Ndërkombëtar”.
