Kritikët dhe familjet e viktimave e shohin këtë imazh si një tallje të hapur të viktimave të tragjedisë së fundit.
Karikatura e kontestuar vjen menjëherë pas zjarrit të tmerrshëm që ndodhi gjatë festimit të Vitit të Ri në barin “Le Constellation” në resortin e famshëm të skive zvicerane. 40 persona humbën jetën në zjarr, ndërsa 116 u plagosën. Sipas informacioneve të fundit të së hënës, rreth 80 të plagosur ende po marrin trajtim spitalor.
Vizatimi nga autori i njohur me pseudonimin Salch, i publikuar në Facebook, titullohet “Skiatorët e Djegur” (Les Brûlés font du ski). Fotografia tregon dy persona, dukshëm të karbonizuar dhe të mbuluar me fasha, duke zbritur me ski nga një mal. Shenja në shtyllë tregon mbishkrimin “Crans-Montana”, ndërsa në këndin e poshtëm të djathtë ka përshkrimin: “Komedia e vitit”.
Titulli është një referencë e drejtpërdrejtë për komedinë kult franceze të viteve 1970 “Les Bronzés font du Ski” (Skiatorët e nxirë).
Mijëra përdorues në rrjetet sociale reaguan me “emotikone të zemëruara” dhe komente dënuese.
“Kjo është vërtet patetike”, shkroi një përdorues, ndërsa të tjerë akuzuan revistën për mungesë të plotë empatie për viktimat.
Reagimet nuk mbetën vetëm në internet. Autorja zvicerane Béatrice Riand dhe bashkëshorti i saj, avokat me profesion, ngritën një padi penale për shkak të karikaturës.
“E gjej këtë thellësisht të neveritshme”, tha Riand për transmetuesin zviceran RTS. “Liria e shprehjes ka kufijtë e saj. Ata tallen me viktimat. Pyetja është: A ka përparësi dinjiteti njerëzor mbi lirinë e shprehjes apo jo?”
Kryeredaktori i Charlie Hebdo, Gérard Biard, pranoi për RTS se karikaturisti shkoi “shumë larg”, duke e përshkruar veprën si humor të zi.
«Sigurisht që mund të trondisë, por satira supozohet të trondisë», tha Biard.
Ai shtoi se revista nuk kishte për qëllim të tallte viktimat, por më tepër të tregonte absurditetin e vetë tragjedisë.
Charlie Hebdo njihet për përmbajtjen e saj provokuese dhe transgresive. Ju kujtojmë se në janar të vitit 2015, redaksia e revistës ishte cak i një sulmi terrorist nga ISIS, në të cilin u vranë 12 persona, pasi ata publikuan karikatura të Profetit Muhamed.
