Rreth 2,000 njerëz janë vrarë gjatë javëve të protestave në Iran, tha një zyrtar i lartë iranian për Reuters të hënën, duke shtuar se midis të vdekurve ishin civilë dhe forca të sigurisë.
Sipas tij, “elementët terroristë” të cilët, sipas autoriteteve, përfituan nga demonstratat masive për të shkaktuar kaos, dhunë dhe konflikt të armatosur janë përgjegjës për një numër të madh vdekjesh.
Protestat në Iran kanë vazhduar që nga 28 dhjetori dhe u nxitën nga një situatë e vështirë ekonomike, inflacioni në rritje, papunësia, rënia e standardeve të jetesës dhe pakënaqësia e qytetarëve me korrupsionin dhe mënyrën se si drejtohet vendi. Demonstratat u përhapën shpejt në disa qytete dhe provinca në të gjithë vendin.
Që nga fillimi i protestave, autoritetet iraniane kanë kufizuar aksesin në internet dhe kanë ndërprerë pothuajse të gjitha format e komunikimit dixhital, duke penguar më tej raportimin e pavarur dhe verifikimin e informacionit. Si rezultat, numri i saktë i viktimave, lëndimeve dhe arrestimeve nuk mund të përcaktohet me besueshmëri, dhe të dhënat që vijnë nga vendi janë fragmentare dhe shpesh kontradiktore.
Organizatat ndërkombëtare për të drejtat e njeriut dhe disa qeveri perëndimore kanë shprehur shqetësim në lidhje me përdorimin e forcës kundër protestuesve dhe u kanë bërë thirrje autoriteteve iraniane të lejojnë rrjedhën e lirë të informacionit dhe hetime të pavarura mbi akuzat për vrasje masive.
Nga ana tjetër, Teherani zyrtar këmbëngul se po përballet me një përpjekje për të destabilizuar shtetin, duke akuzuar faktorët e huaj dhe grupet e organizuara për nxitje të trazirave dhe duke deklaruar se forcat e sigurisë vepruan për të ruajtur rendin dhe sigurinë publike.
Situata në Iran mbetet e pasigurt dhe, për shkak të bllokadës së informacionit, situata reale në terren, si dhe numri përfundimtar i viktimave, mbeten të panjohura për publikun jashtë vendit.
