Kryetari i Lidhjes Demokratike të Kosovës, Lumir Abdixhiku, ka njoftuar dorëheqjen e tij nga pozita, duke thënë se ky është hapi më moral që një kryetar mund të marrë.
Në një postim në Facebook, Abdixhiku thekson se vendimi nuk është i tij personal, por i partisë, dhe se pas pesë orë e gjysmë diskutimesh brenda LDK-së, është arritur një dakordësi për të respektuar vendimin e shumicës së anëtarësisë.
Ai shton se nuk është i lidhur pas pozitës, por pas shtëpisë së partisë, dhe se çdo vendim për të ardhmen politike do të merret në Kuvendin e LDK-së, ku sipas tij do të diskutohet hapur dhe me përgjegjësi.
“Fatin tim politik e vendos përballë LDK-së, jo mbi LDK-në. Çfarëdo vendimi që merr Kuvendi, do ta respektoj me nder dhe qetësi,” shkruan Abdixhiku, duke kërkuar nga anëtarët të veprojnë pa dramë dhe me dinjitet.
