Kreu i LDK-së, Lumir Abdixhiku në takim me takim Përfaqësuesin e Posaçëm të BE-së për dialogun Kosovë–Serbi, Peter Sørensen, ka potencuar rëndësinë e mbështetjes ndërkombëtare për rrugëtimin euro-atlantik.
“Në përmbyllje të takimit, shpreha pritjen që Bashkimi Evropian të vazhdojë angazhimin dhe mbështetjen për Kosovën, si në proceset e përgjithshme politike, ashtu edhe në rrugëtimin e saj drejt integrimit evropian dhe forcimit të perspektivës euroatlantike të vendit”, ka shkruar ai në “Facebook”.
Abdixhiku ka thënë se kanë biseduar edhe për situatën aktuale politike në vend dhe për proceset ndërkombëtare që e presin Kosovën.
“Theksova rëndësinë e stabilitetit institucional dhe konsolidimit demokratik në vend, si parakushte për funksionimin normal të institucioneve, për besimin e qytetarëve te shteti, për zhvillimin ekonomik, për tërheqjen e investimeve dhe për ruajtjen e kredibilitetit ndërkombëtar të Kosovës”, vazhdon postimi.
