Edhe gjatë seancës së sotme gjyqësore, ish-zyrtarët e Korporatës Energjetike të Kosovës (KEK), Nagip Krasniqi dhe Isuf Zejna, të cilët akuzohen nga Prokuroria Speciale për dëmtim të buxhetit të shtetit me rreth 37 milionë euro, u deklaruan të pafajshëm. Në këtë proces pritet të dëshmojnë 25 dëshmitarë dhe një ekspert i fushës. Seanca e radhës do të mbahet më 27 shkurt.
Në seancën e shqyrtimit gjyqësor, prokurorja Fikrije Zejnullahu deklaroi se për shkak të mungesës së funksionimit të kalldajës A5, KEK-u ishte i detyruar të blinte energji me çmime shumë më të larta, duke shkaktuar dëme në vlerë prej 37 milionë euro.
Ndaj pikave të aktakuzës, të akuzuarit reaguan duke i cilësuar ato të pabazuara dhe të montuara. Ish-kryeshefi i KEK-ut, Nagip Krasniqi, tha se “ky rast i Prokurorisë është i montuar dhe kjo vërtetohet nga vet fakti i arrestimit dhe mbajtjes në paraburgim prej pesë muajsh, që në fakt ka qenë një dënim pa u zhvilluar gjykimi”. Ai shtoi se ka dhjetëra raste të tjera të akuzave ndaj zyrtarëve publik për keqpërdorim të detyrës, ku nuk është kryer arrestim, gjë që sipas tij tregon tendencën e Prokurorisë në këtë rast.
Ndërkaq, Isuf Zejna theksoi se vetëm në vitin 2023, KEK-u ka lidhur kontrata me procedurë të negociuar në vlerë prej 117 milionë eurosh, ndërsa prokuroria ka fokusuar vëmendjen vetëm në një kontratë prej 60 mijë eurosh. Ai shtoi se KEK-u ka lidhur edhe kontrata të tjera për shërbime ligjore me vlera shumëfish më të larta se ajo për të cilën akuzohen.
Ish-kryeshefi i KEK-ut, Nagip Krasniqi, së bashku me Ymer Dragushën dhe Isuf Zejnën, akuzohen se gjatë periudhës 2021–2023, me veprimet e tyre të kundërligjshme kanë shkaktuar dëme në buxhetin e Kosovës prej rreth 37 milionë euro, duke kryer veprat penale “keqpërdorimi i detyrës apo autoritetit zyrtar”, “zbulimi i fshehtësisë zyrtare” dhe “ndihmë në keqpërdorim të detyrës apo autoritetit zyrtar”.
Në këtë rast, për akuzuarin Dragusha, Gjykata aprovoi në shkurt të vitit të kaluar marrëveshjen e fajësisë me Prokurorinë. Seanca e radhës për këtë proces gjyqësor do të mbahet më 27 shkurt, ku pritet të dëshmojnë 25 dëshmitarë dhe një ekspert i fushës.
