Nga 9 deri më 18 shkurt do të mbahen deklaratat përmbyllëse në gjykimin për krime lufte ndaj Hashim Thaçit, Kadri Veselit, Rexhep Selimit dhe Jakup Krasniqit, në Dhomat e Specializuara të Kosovës në Hagë.
Sipas njoftimit për media të DHSK-së, seancat janë planifikuar të zhvillohen nga ora 09:00 deri në 16:30 dhe mund të përcillen përmes transmetimit në faqen zyrtare të gjykatës, me 45 minuta vonesë, në tri gjuhët e gjykatës: shqip, serbisht dhe anglisht, si dhe nga galeria publike.
Për shkak të interesimit të madh, për ndjekjen e seancave nga galeria publike kërkohet regjistrim paraprak. Të interesuarit duhet të dërgojnë email në adresën PUBLIC@scp-ks.org, ndërsa gazetarët duhet të tregojnë mediumin që përfaqësojnë dhe nëse kanë nevojë për ulëse në qendrën për media. Afati për regjistrim paraprak është deri të premten, 30 janar, në ora 17:30, ndërsa konfirmimet do të dërgohen më së voni më 5 shkurt.
Sipas rendit të ditës, më 9 shkurt do të paraqitet deklarata përmbyllëse e Prokurorisë, ndërsa më 10 shkurt do të vazhdojë Prokuroria dhe do të dëgjohet deklarata e Mbrojtjes së Viktimave. Më 11 shkurt janë planifikuar deklaratat e Mbrojtjes së Thaçit dhe Veselit, më 12 shkurt vazhdon Mbrojtja e Veselit dhe ajo e Selimit, ndërsa më 13 shkurt do të paraqiten deklaratat e Mbrojtjes së Selimit dhe Krasniqit. Më 16 shkurt parashihet përfundimi i deklaratave të Mbrojtjes së Krasniqit dhe pyetje të mundshme nga Trupi Gjykues, ndërsa më 18 shkurt janë paraparë përgjigjet e palëve dhe deklaratat e të akuzuarve.
Aktakuza fillestare ndaj katër të akuzuarve u konfirmua më 26 tetor 2020 dhe u ndryshua disa herë, ndërsa versioni në fuqi është ai i dorëzuar më 27 shkurt 2023. Të akuzuarit ngarkohen me gjashtë akuza për krime kundër njerëzimit dhe katër akuza për krime lufte, që pretendohet se janë kryer nga marsi deri në shtator 1999 në Kosovë dhe në Kukës e Cahan në veri të Shqipërisë.
Ndryshe gjykimi ka nisur më 3 prill 2023. Zyra e Prokurorit të Specializuar përfundoi paraqitjen e provave më 15 prill 2025, ndërsa më pas provat u paraqitën nga Mbrojtja e Viktimave dhe ekipet mbrojtëse të të akuzuarve. Trupi Gjykues mbylli procedurën e paraqitjes së provave më 19 dhjetor 2025.
Pas deklaratave përmbyllëse, Trupi Gjykues do të fillojë kuvendimet për nxjerrjen e aktgjykimit, i cili pritet të shpallet brenda 90 ditësh, me mundësi shtyrjeje edhe për 60 ditë shtesë.
