Me rastin e shënimit të 27-vjetorit të Masakrës së Reçakut, në Shtëpinë e Kulturës në Shtime u mbajt edicioni i dytë i ekspozitës “Çmimi William Walker”, e organizuar për të përkujtuar dhe nderuar viktimat e një prej ngjarjeve më të dhimbshme të historisë së luftës në Kosovë.
Pak para fillimit të Akademisë Përkujtimore, ekspozitën e vizituan krerët e shtetit, së bashku me kryetarin e Komunës së Shtimes, Qemajl Aliu, të cilët patën mundësinë të shohin nga afër këtë ekspozitë tashmë tradicionale.
Në këtë edicion morën pjesë artistë nga rajoni dhe më gjerë, të cilët prezantuan punime artistike që reflektojnë dhe dokumentojnë dhimbjen, vuajtjet, por edhe qëndresën e popullit shqiptar gjatë periudhës së luftës. Çdo pikturë, grafikë, skulpturë apo mozaik paraqet një rrëfim të gjallë artistik, që përball ballë na vë me të vërtetën historike, e cila nuk duhet harruar kurrë.
I pranishëm në ekspozitë ishte edhe ambasadori William Walker, figura kyçe që ndërkombëtarizoi të vërtetën e Masakrës së Reçakut.
Po ashtu, ekspozitën e vizitoi edhe nënkryetari i Komunës së Shtimes, Adnan Ademi, së bashku me bashkëpunëtorë, i cili shprehu vlerësimin e tij për punën dhe përkushtimin e artistëve pjesëmarrës.
Fituesit e këtij edicioni ishin:
Çmimi për Grafikë: Astrit Rexhepi
Çmimi për Mozaik me Tekstil: Fatos Kabashi
Çmimi Kryesor “Çmimi William Walker”: Laura Siner Brahimi.
Ekspozita u ideua dhe u organizua nga artistja Emine Jetishi, e cila për herë të dytë solli këtë iniciativë artistike me qëllim reflektimin mbi historinë dhe mbajtjen gjallë të kujtesës për sakrificën e popullit shqiptar.
