U përkujtua, Oliver Ivanoviq, ish-lider i Iniciativës Qytetare “Liri, Demokraci, Drejtësi”, në Mitrovicën e Veriut, tetë vjet pas vrasjes së tij. Para ish-zyrave të kësaj iniciative, familjarë, miq, bashkëpunëtorë dhe qytetarë vendosën lule dhe ndezën qirinj, duke rikujtuar figurën e tij politike dhe duke theksuar se drejtësia për këtë krim ende mungon
Përpara ish-zyrave të Iniciativës Qytetare “Liri, Demokraci, Drejtësi” në Mitrovicën e Veriut, sot është përkujtuar Oliver Ivanoviqi, liderit të kësaj iniciative, i cili u vra në atë vend tetë vjet më parë.
Anëtarë të familjes, miq, bashkëpunëtorë, bashkëmendimtarë politikë dhe qytetarë vendosën lule dhe ndezën qirinj, duke theksuar se drejtësia për këtë krim ende nuk është vënë në vend.
“Oliveri ishte një njeri që u vra vetëm sepse dinte të mendonte lirshëm dhe të vepronte lirshëm. Detyrimi ynë ndaj tij është ta kujtojmë sa të jemi gjallë dhe përderisa ekziston qoftë edhe një njeri në Kosovë që ndez një qiri, Oliveri nuk do të harrohet. Ajo që është shumë e rëndësishme të thuhet është se vrasja e tij ishte në fakt një paralajmërim për të gjithë ne të tjerët, të cilët në një mënyrë apo tjetër dinim të thoshim se mendojmë lirshëm dhe veprojmë lirshëm, se mund të pësonim njësoj si ai”, tha Dejan Nedelkoviq, mik i familjes Ivanoviq.
Srgjan Milivojeviq vlerësoi se drejtësia në këtë rast ende nuk është arritur dhe se është i domosdoshëm një gjyqësor i pavarur për ta zbardhur vrasjen.
“Besoj se në Serbi po vjen koha e lirisë dhe pas saj ecën edhe drejtësia. Jam absolutisht i sigurt se një gjyqësor i lirë dhe i pavarur do të arrijë ta zgjidhë këtë, për momentin, mister të vrasjes, ku vrasësit sigurisht që janë të njohur për shumë njerëz nga maja e këtij regjimi. Jam plotësisht i bindur se nuk do të ketë drejtësi për asnjë njeri në Serbi derisa të ketë drejtësi për Oliver Ivanoviqin”, tha Milivojeviq.
Të pranishmit theksuan se Oliver Ivanoviqi ishte një politikan i shquar dhe përkrahës i pajtimit.
Avokati Nebojsha Vlajiq thekson se besimi në procedurat, si në Beograd ashtu edhe në Prishtinë, pothuajse nuk ekziston, por se megjithatë beson se e vërteta do të dalë në dritë herët a vonë.
Oliver Ivanoviqi u vra me të shtëna pas shpine, në orët e hershme të mëngjesit të 16 janarit 2018, përpara selisë së partisë së tij në Mitrovicën e Veriut.
