Në Maqedoninë e Veriut po diskutohet ligji për shkeljet në trafik, i cili pritet të miratohet në Kuvend dhe të hyjë në fuqi më 1 shkurt.
Pas vendosjes së kamerave të sigurisë në disa qytete dhe nëpër autostradat e Maqedonisë së Veriut, kryeministri Hristijan Mickoski deklaroi sot se nuk ka dilema se ligji për shkeljet në trafik do të miratohet në Kuvend dhe do të hyjë në fuqi më 1 shkurt.
“Ajo për të cilën u morëm vesh në takimin e liderëve ishte mbështetja pa kushte. Megjithatë, u dakorduam që në nivel të koordinatorëve të grupeve parlamentare të mbahen mbledhje për t’i qartësuar të gjitha çështjet e paqarta. Kjo mbledhje u mbajt, u sqaruan të gjitha dilemat dhe pres që ligji në seancën e ardhshme parlamentare të miratohet. Ai kalon me dy të tretat e votave, pa Badenter”, tha ai.
Mickoski pret që për këtë ligj të votojnë edhe deputetët e partive shqiptare në opozitë.
Kryetari i BDI-së, Ali Ahmeti, në takimin e liderëve politikë që u mbajt ditë më parë në Shkup, u shpreh se qëndrimin e tij për ligjin për kundërvajtje dhe për çështje të tjera politike do ta bëjë publik pas një takimi dypalësh që pritet ta realizojë me kryeministrin Mickoski.
“Mbetet që në të ardhmen të zhvillohet një takim mes meje dhe kryeministrit Mickoski për t’i diskutuar këto çështje dhe për të parë se çfarë zgjidhje mund të japim”, theksoi ai.
Kamerat e sigurisë tashmë janë vendosur në Shkup, Tetovë dhe në disa qytete të tjera të Maqedonisë së Veriut.
Nëse ligji miratohet në Kuvend dhe hyn në fuqi më 1 shkurt, ai pritet të përfshijë vetëm katër lloje shkeljesh: parkim të paligjshëm, kalim në semafor të kuq, drejtim të mjetit me regjistrim të skaduar dhe tejkalim të shpejtësisë.
