Agjencia e Statistikave të Kosovës (ASK) ka publikuar Statistikat e Mirëqenies Sociale për muajin dhjetor 2025, duke paraqitur të dhëna krahasuese për numrin e përfituesve nga skemat pensionale dhe skemat e tjera të mirëqenies sociale, ku vërehen rënie dhe rritje të ndryshme krahasuar me dhjetorin e vitit 2024.
Sipas ASK-së, në dhjetor 2025 është shënuar rënie e numrit të përfituesve nga disa skema pensionale, krahasuar me dhjetorin e vitit 2024.
“Në muajin dhjetor 2025, krahasuar me muajin dhjetor 2024, kishte rënie të numrit të përfituesve nga: skema për pensionet invalidore (-27,5 %); skema për pensionet e Trepçës (-20,6 %); skema për pensionet familjare (-10,6 %); skema e ndihmës sociale (-10,3 %); skema e pensioneve kontributpaguese të moshës (-2,0 %); skema për familjet e dëshmorëve dhe invalidët e luftës (-1,4 %),” thuhet në publikimin e ASK-së.
Nga ana tjetër, ASK njofton se ka pasur rritje të numrit të përfituesve në disa skema të tjera.
“Në muajin dhjetor 2025, krahasuar me muajin dhjetor 2024, kishte rritje të numrit të përfituesve nga: skema për Pensionet Paraplegjike dhe Tetraplegjike (12,6 %); skema e pensioneve të Forcës së Sigurisë së Kosovës (8,6 %); skema për përkrahje financiare familjeve që kanë fëmijë me aftësi të kufizuara (8,0 %); skema e pensioneve bazike të moshës (7,5 %); skema e kompensimit për punëtorët e arsimit që punuan gjatë vitit shkollor 1990/91 deri në vitin shkollor 1998/99 (5,1 %); skema e pensioneve për personat me aftësi të kufizuara (4,5 %); skema për veteranët e luftës (2,7 %); skema e pensioneve të Trupave Mbrojtëse të Kosovës (0,8 %) dhe skema e kompensimeve për personat e verbër (1,2 %),” thekson ASK. 
