“Motori evropian i zbatimit: Fitimi i garës së Inteligjencës Artificiale përmes specializimit” ishte paneli i diskutimit i mbajtur në kuadër të Forumit Ekonomik në Davos, duke çuar ‘zëra’ nga Kosova që përfaqësuan praktikën tonë në raport me realitetin e ri me AI.
Lulëzon Jagxhiu, këshilltari i kryeministrit për Teknologjinë e Informacionit, Albin Kurti foli për rëndësinë e njohjes dhe besueshmërisë ndaj inteligjencës artificiale, si hapa fillestar që shpijnë te përdorimi i saj nga institucionet.
“Është shumë me rëndësi që BE i ka hapur dyert me fabrika, antena si platforma për vende aspiruese për të qenë pjesë e BE-së, siç është Kosova. Kjo është shumë e mirë sepse na hap dyer në kuptimin e qasjes në këtë infrastrukturë të inteligjencës artificiale por, që është mirë edhe për BE-në sepse e zgjeron atë mundësinë e talenteve. Vendet si Kosova kanë shumëçka për të ofruar nga popullata e re, por edhe në kuptimin e sektorit shumë të gjallë e dinamik teknologjik të ndërtuar me shumë vite. Jemi mjaft mirë e të gatshëm për të kontribuuar në këtë qasje evropiane të inteligjencës artificiale”, tha ai.
Rëndësinë e rinisë si përbërës të përqindjes më të madhe të popullsisë në Kosovë e potencoi edhe Ilir Aliu, strateg i Teknologjisë dhe Komunikimit.
“Një prej forcave të Kosovës është se e kemi bagazhin që shumë shtete nuk e kanë, Gjermania përshembull ka popullatë të moshuar, probleme demografike, pra kemi popull në moshë të ri. Pra duhet të ndodh ai transformimi mendor së pari, ka shumë njerëz që duan të qëndrojnë në punët ku janë të mira por shpesh mungon inovacioni në punë të tilla”, tha Aliu.
Në anën tjetër Alex Pentland, specialist i të dhënave dhe themelues i MIT Media Lab deklaroi se çështja e adaptimit të shteteve të vogla me infrastrukturën e inteligjencës artificiale sado që mund të duket e komplikuar komplikimet politike, shpesh pikërisht në këto vende shtrirja mund të jetë më fleksibile dhe më e lehtë.
