Një shtatore të derdhur në bronz e meriton Lah Nimani, ka thënë Adem Zejnullahu.
Të enjtën është promovuar libri monografik “Lah Nimani – emblemë e përjetësisë”, i autorit Fazli Hajrizi.
Recensenti i librit, Adem Zejnullahu, ka theksuar se në vepër vihet në pah sidomos kontributi i Lah Nimanit në fushën e sportit dhe të boksit, jo vetëm në Kosovë dhe ish-Jugosllavi, por edhe në Evropë e në botë. Sipas tij, Lah Nimani hyri në boksin kosovar duke fituar të gjitha sfidat dhe duke lënë gjurmë të pashlyeshme, ndërsa përmes sportit e bëri të njohur Kosovën dhe popullin e saj në arenën ndërkombëtare.
Ish-kapiteni i Klubit të Boksit Prishtina, Mehmet Bogujevci, ka kujtuar raportin e veçantë që boksierët kishin me Lah Nimanin. Ai ka thënë se boksierët e klubit të kryeqytetit Lah Nimanin e kishin edhe shok, edhe vëlla, edhe baba, sipas nevojës. “Me Lah Nimanin në Klubin e Boksit Prishtina kemi qenë një familje. Prishtinës i ka marrë lakmi e gjithë Jugosllavia”, ka deklaruar Bogujevci.
Ndërkohë, drejtori i RTK-së, Rilind Gërvalla, ka theksuar se Lah Nimani është një emër që nuk i përket vetëm historisë së boksit shqiptar, por vetë historisë së dinjitetit sportiv dhe kombëtar. Ai ka vlerësuar se Lah Nimani erdhi në klubin e Prishtinës jo thjesht si trajner, por si vizionar, duke formuar jo vetëm boksierë kampionë, por edhe njerëz e breza me vlera, për çka mbetet trajneri më i madh shqiptar në historinë e boksit shqiptar.
Edhe trajneri i xhudos, Driton Kuka, ka thënë se ndihet i privilegjuar të flasë për një trajner të madh si Lah Nimani. Sipas tij, puna, metodat dhe filozofia e Lah Nimanit, si dhe mënyra se si ai e bëri të njohur Kosovën në atë kohë, e bënë emrin dhe ekipin e tij simbol të forcës, qëndrueshmërisë dhe virtyteve të popullit shqiptar.
