Organizata e Veteranëve të Luftës së UÇK-së ka reaguar ndaj veprimeve të fundit të Dhomave të Specializuara në Hagë, duke i cilësuar ato si përpjekje të qëllimshme për menaxhim të imazhit publik dhe “kontroll të dëmit”, pas, siç thuhet, shkeljeve të njëpasnjëshme ndaj të drejtave themelore të të akuzuarve dhe rendit kushtetues të Republikës së Kosovës.
Reagimi i OVL UÇK-së pason informacionet se Dhomat e Specializuara po mbajnë ligjërata nëpër shkollat e Kosovës, për të arsyetuar veprimet e saja në gjykatë kundër krerëve të UÇK-së.
Në reagim thuhet se Gjykata Speciale, në vend të fushatave propagandistike, duhet të fokusohet në rikthimin e besueshmërisë përmes respektimit të Kushtetutës së Kosovës, ligjeve vendore dhe standardeve ndërkombëtare të drejtësisë.
Sipas veteranëve, veprimet aktuale të Dhomave të Specializuara rikujtojnë praktika të njohura nga e kaluara, konkretisht nga periudha e ish-Jugosllavisë, kur, pas demonstratave studentore të vitit 1981, pushteti i atëhershëm organizonte fushata politike dhe psikologjike për të përgatitur opinionin publik që të pranonte dënime të rënda ndaj rinisë shqiptare.
“Një qasje e tillë e propagandës dhe presionit institucional nuk i shërben drejtësisë, por imponimit të një narrative të parapërgatitur,” thuhet në reagim.
Organizata rendit disa shkelje që, sipas saj, kanë dëmtuar rëndë besueshmërinë e Gjykatës Speciale. Ndër to përmenden shkelja e parimit të barazisë para ligjit, duke ndjekur penalisht vetëm ish-pjesëtarë të Ushtrisë Çlirimtare të Kosovës, ndërkohë që krimet e kryera nga forcat serbe mbeten të pandëshkuara.
Po ashtu, kritikohet mohimi i vazhdueshëm i lirimit të përkohshëm, edhe në raste humanitare, zgjatja e pajustifikueshme e paraburgimit pa vendime përfundimtare, si dhe trajtimi i të paraburgosurve në kushte që, sipas reagimit, cenojnë dinjitetin njerëzor dhe nuk përputhen me standardet e Konventës Evropiane për të Drejtat e Njeriut.
Veteranët e UÇK-së ngrenë shqetësime edhe për mungesë të transparencës dhe llogaridhënies publike, duke përfshirë refuzimin e Gjykatës Speciale për të adresuar shqetësimet e institucioneve dhe organizatave të dala nga lufta. Një tjetër pikë kritike, sipas UVL të UÇK-së, është ndërhyrja indirekte në sfera të ndjeshme shoqërore, si arsimi, pa autorizim institucional dhe pa debat publik, çka, sipas tyre, ngre dyshime serioze për ndikim dhe propagandë.
Organizata e Veteranëve disa herë ka bërë thirrje që drejtësia ndërkombëtare të veprojë mbi parimet e paanshmërisë, proporcionalitetit dhe respektimit të të drejtave të njeriut.
Ndryshe zëdhënësi i Dhomave të Specializuara të Kosovës, Michael Doyle, ka konfirmuar për RTKLive se aktivitetet që kjo gjykatë zhvillon në Kosovë në kuadër të Programit të Outreach-it kanë karakter informues dhe nuk përbëjnë ligjërata.
“Që nga viti 2018, Dhomat e Specializuara të Kosovës (DSK) organizojnë rregullisht aktivitete në mbarë Kosovën me grupe të ndryshme, përfshirë studentë, por edhe anëtarë të komuniteteve lokale, juristë, gazetarë dhe të tjerë, në kuadër të Programit të Outreach-it të Gjykatës”, ka deklaruar Doyle për RTKLive.
