Një aksident orteku ka ndodhur në Brezovicë, në një zonë jashtë shtegut të rregulluar, ku fatmirësisht nuk pati të lënduar. Shërbimi i Kërkim-Shpëtimit Malor i Kosovës paralajmëron për rrezik të shtuar nga ortekët dhe apelon për kujdes maksimal gjatë skijimit dhe aktiviteteve bjeshkatare.
Shërbimi i Kërkim-Shpëtimit Malor i Kosovës (ShKShMK) ka njoftuar se më 18 janar është regjistruar një aksident orteku në Brezovicë, në një zonë jashtë shtegut të rregulluar. “Orteku është iniciuar nga disa skitarë, por fatmirësisht personat e përfshirë kanë shpëtuar pa lëndime,” thuhet në njoftimin e ShKShMK.
Gjatë kontrollimit të shtresave të borës, teknikët e ShKShMK kanë evidentuar dy shtresa problematike në zonë, ku më shqetësuesja është shtresa bazë mbi vegjetacion (Ground-based Persistent Weak Layer – Depth Hoar). Si pasojë e reshjeve të fundit dhe erërave të forta nga juglindja, janë krijuar akumulime të shtresave të konsoliduara të borës, duke rritur peshën dhe presionin mbi këto shtresa të dobëta. Bazuar në vlerësimin aktual, kombinimi i këtyre faktorëve ka krijuar kushte të pafavorshme dhe rrezik të shtuar për ortekë.
ShKShMK apelon për kujdes maksimal gjatë skijimit dhe aktiviteteve bjeshkatare, veçanërisht në faqet veriore, “pa përjashtuar rrezikun edhe në orientime dhe pozita të tjera gjeografike.”
Në njoftim theksohet gjithashtu:
Shmangni lëvizjet jashtë shtigjeve të sigurta.
Informohuni paraprakisht për kushtet e borës dhe motit.
Përdorni pajisje adekuate të sigurisë.
Mos veproni individualisht në terrene të rrezikshme.
