Syzet e diellit “pilot” të Emmanuel Macron rritën aksionet e prodhuesit të tyre iVision Tech me gati 28 përqind pas fjalimit të tij në Forumin Ekonomik Botëror vjetor në Davos.
Grupi, i cili zotëron markën franceze të syzeve luksoze Henry Jullien, tha se modeli që mbante veshur Macron ishte Pacific S 01 i tyre, i cili kushton 659 euro.
“Kjo me siguri ka krijuar një efekt mahnitës në aksione”, tha për Reuters CEO i iVision Tech, Stefano Fulchir.
Fulchir tha se zyra e Macron kontaktoi kompaninë në vitin 2024 për të blerë një palë syze dielli Pacific S 01 Double Gold për 659 euro si dhuratë diplomatike gjatë samitit të G20 dhe një palë të tjera për veten e tij.
“Thashë se do të isha i lumtur t’i dërgoja një palë, por ata thanë jo. Ai nuk i pranoi si dhuratë, por donte t’i blinte vetë. Presidenti francez i kushtoi shumë vëmendje nëse syzet ishin prodhuar tërësisht në Francë”, tha ai.
Ai shtoi se u regjistrua një rritje e aksioneve prej rreth 3.5 milionë eurosh.
Memet, komentet dhe spekulimet rreth paraqitjes së Macron u shfaqën shpejt në mediat sociale, me referenca të kudondodhura për filmin e vitit 1986 “Top Gun” me protagonist Tom Cruise.
Zyra e Macron tha se vendimi për të mbajtur syze dielli gjatë fjalimit, i cili u zhvillua në ambiente të mbyllura, ishte për të mbrojtur sytë e tij nga një enë gjaku e plasur.
