Tre persona janë vrarë në një të shtënë me armë në një qytet të vogël në shtetin australian të Uellsit të Ri Jugor, tha policia, sipas BBC-së .
Një person i katërt u dërgua në spital dhe është në gjendje të rëndë, por të qëndrueshme.Të shtënat ndodhën në liqenin Cargelligo rreth orës 16:40 sipas orës lokale (06:40 CET) dhe policia lokale ka nisur një hetim. Banorëve u është kërkuar të shmangin zonën dhe të qëndrojnë në shtëpitë e tyre.
Në një deklaratë të policisë, thuhet se shërbimet e emergjencës ndërhynë në Rrugën Walker pas një raportimi për të shtëna. Dy gra dhe një burrë vdiqën në vendngjarje.
Gazeta australiane The Sydney Morning Herald raportoi se sulmi dyshohej se kishte lidhje me dhunën në familje. Sipas të njëjtit burim, policia është ende në kërkim të sulmuesit dhe në vendngjarje janë dërguar njësi speciale të policisë të armatosura rëndë.Ky incident ndodhi vetëm një muaj pas të shtënave masive në Bondi Beach në Sydney, në të cilat u vranë 15 persona.
