Në Qendrën e Numërimit dhe Rezultateve po vazhdon rinumërimi i votave për kandidatë, dhe sipas Komisionit Qendror të Zgjedhjeve deri në ora 16:00 janë rinumëruar mbi 58 për qind e vendvotimeve, apo 1, 500 nga 2,557 sa do të numërohen në total me vendim të KQZ-së.
Procesi në tërësi është përmbyllur në 22 komuna, ka njoftuar Zëdhënësi i KQZ-së, Valmir Elezi që ka thënë se në platfomën e KQZ-së për rezultate do të paraqiten rezultatet pas numërimit të çdo vendvotimi.
Ndërkohë, KQZ-ja planifikon që gjatë javës së ardhshme të përmbyllë në tërësi procesin e rinumërimit e më pas të dalin me rezultatet përfundimtare.
Vendim i KQZ-së për rinumërim erdhi pas evidentimit të manipulimeve me vota të kandidatëve brenda partive politike, ku për një kandidat ka arritur të shkojë diferenca deri në mbi 6 mijë vota, për çka u aktivizua edhe Prokuroria e Shtetit.
Prokuroria Themelore në Prizren ka arrestuar 109 persona si të dyshuar derisa edhe prokurori të tjera janë angazhuar për të mbledhur informacione e prova për manipulime të mundshme me vullnetin e qytetarëve.
