Më 26 janar, çmimi i arit në bursat globale u rrit mbi 5,000 dollarë për ons për herë të parë në histori, mes tensioneve gjeopolitike në rritje, raporton Reuters. Metali i çmuar u tregtua me 5,029 dollarë për ons në bursat globale të hënën në mëngjes.

Ekspertët, vëren agjencia, parashikojnë se çmimi i arit, të cilit investitorët tradicionalisht i drejtohen gjatë periudhave të paqëndrueshmërisë, do të vazhdojë të rritet. Ndër arsyet kryesore, analistët përmendin tensionet në rritje midis Shteteve të Bashkuara dhe NATO-s për shkak të Groenlandës dhe luftën e vazhdueshme midis Rusisë dhe Ukrainës.

Kërkesa për ar, shkruan Reuters, u ndikua gjithashtu nga kërcënimi i SHBA-së per te vendosur nje tarife 100 per qind për importet nga Kanadaja nëse vendi nënshkruan një marrëveshje tregtare me Kinën.

Në vitin 2025, raporton Reuters, çmimi i arit u rrit me 64% për shkak të lehtësimit të politikës monetare të SHBA-së, kërkesës nga banka qendrore e Kinës dhe interesit të fortë të investitorëve për metalet e çmuara.

Bloomberg llogariti në janar se vlera e rezervave të arit të Bankës Qendrore Ruse është rritur me më shumë se 216 miliardë rubla që nga fillimi i luftës ruso-ukrainase në vitin 2022. Sipas agjencisë, ari përbën afërsisht 43% të rezervave të Bankës së Rusisë, krahasuar me 21% para shpërthimit të luftës së madhe me Ukrainën.

Rusia është një nga prodhuesit më të mëdhenj të arit në botë. Megjithatë, qasja në metalin e çmuar nga Rusia në tregjet ndërkombëtare është e kufizuar për shkak të sanksioneve të vendosura pas fillimit të luftës.