Transportuesit nga Maqedonia e Veriut sot nga ora 12:00 kanë bllokuar trafikun për transportimin e mallrave në 10 pika kufitare me vendet fqinje, në shenjë proteste ndaj vendosjes së sistemit të ri të hyrje-daljeve (EES) të Bashkimit Evropian.
Sipas njoftimit të protestuesve, nga mesnata do të bllokohen të gjitha hyrjet në Maqedoninë e Veriut edhe për automjetet e rënda, ndërsa në pikat kufitare do të lejohen vetëm transportuesit e ilaçeve, kafshëve, eksplozivëve dhe municioneve.
Asociacioni i transportuesve “MAKAM TRANS” ka bërë të ditur se protestës i janë bashkëngjitur edhe transportues nga Turqia. Përfaqësuesja e këtij asociacioni, Biljana Muratovska, ka deklaruar se vendosja e sistemit EES paraqet diskriminim të transportit rrugor.
Sipas saj, Bashkimi Evropian ka përjashtuar nga numërimi i ditëve të qëndrimit llojet e tjera të transportit, si ai ajror, detar dhe hekurudhor, ndërsa transportuesit rrugorë po trajtohen ndryshe. Ajo ka kërkuar trajtim të barabartë për të gjithë transportuesit.
Në mbështetje të protestuesve ka dalë edhe Ministri i Transportit dhe Lidhjeve i Maqedonisë së Veriut, Aleksander Nikollovski, i cili ka kërkuar anulimin e sistemit elektronik për transportuesit.
Nikollovski ka bërë të ditur se po shqyrtohen tri zgjidhje të mundshme: anulimi i sistemit elektronik për transportuesit, rritja e numrit të ditëve të lejuara të qëndrimit në zonën Shengen në së paku 250 ditë, ose trajtimi i transportuesve jo si turistë, por si profesionistë.
Bllokimi i kufijve nuk vlen për transportin e udhëtarëve dhe për automjetet private
