Shtetasja britanike Victoria Hart , nënë e tre fëmijëve të vegjël, vdiq të shtunën pasi u godit me thikë në shtëpinë e saj në Malaga të Spanjës. Sipas raportimeve lokale, vrasja ndodhi rreth orës 11:40 të mëngjesit, ndërsa 33-vjeçarja ishte në shtëpi me fëmijët e saj, raporton The Telegraph.
Fqinjët thanë se ishin fëmijët ata që telefonuan shërbimet e urgjencës. Anthony Bermudez , kryebashkiak i Alhaurín el Grande, ku jetonte Victoria, konfirmoi se qyteti do të shpallte një ditë zyrtare zie të hënën si një “shenjë respekti dhe solidariteti”.
“Këshilli i Qytetit të Alhaurín el Grande shpreh trishtimin e tij për vrasjen e një gruaje në të tridhjetat, një shtetase britanike, e cila ndodhi këtë mëngjes në komunën tonë. Në emër të Këshillit të Qytetit, shprehim ngushëllimet dhe mbështetjen tonë të sinqerta familjes dhe miqve të viktimës, si dhe dënimin tonë të qartë të kësaj dhune me bazë gjinore, një plagë shoqërore që shkel rëndë të drejtat e njeriut dhe që duhet të zhduket”, thanë ata në një deklaratë.Një ish-kliente e Viktorias së vrarë, Mary Crane Woods , e përshkroi atë për median si “një shpirt të bukur, shumë punëtore dhe një nënë të mrekullueshme për fëmijët e saj”.“Viktoria kishte zemrën më të pastër, qëllimi i saj përfundimtar ishte të sigurohej që fëmijët e saj të kishin jetën më të mirë të mundshme. Ajo punoi shumë për t’ua siguruar këtë, duke u siguruar që të ishte e pranishme në aktivitetet e tyre të shumta. Marrëdhëniet familjare ishin jashtëzakonisht të rëndësishme për të”, tha për mediat lokale Anne Khraiche , e cila gjithashtu e njihte atë.
