Sllovakia do të ngrejë një padi për të kundërshtuar vendimin e Bashkimit Evropian të marrë me shumicë të kualifikuar për të ndaluar importin e gazit rus , tha kryeministri sllovak Robert Fico. Dje, vendet anëtare të BE-së dhanë miratimin e tyre përfundimtar për ndalimin e importit të gazit rus deri në fund të vitit 2027, gjë që u kundërshtua nga Sllovakia dhe Hungaria.
Ndalimi ishte hartuar për t’u miratuar nga një shumicë e fortë e shteteve anëtare, gjë që i lejoi BE-së të kapërcente rezistencën nga të dy vendet, të cilat mbeten shumë të varura nga nafta dhe gazi rus dhe duan të ruajnë lidhje të ngushta me Moskën.
Hungaria ka thënë se do ta kundërshtojë ligjin në Gjykatën Evropiane të Drejtësisë (GJED), dhe Fico tha se Sllovakia do të ngrejë padinë e vet dhe do të koordinohet me fqinjin e saj. “Ne do të kundërshtojmë shkeljen e parimeve të subsidiaritetit dhe proporcionalitetit”, tha Fico në një konferencë për shtyp. Ai nuk tha se kur Sllovakia do ta ngrejë padinë.
“Vetëvrasje energjetike”
BE-ja e ka mbështetur Ukrainën që kur Rusia e pushtoi atë në shkurt të vitit 2022 dhe dëshiron të ndërpresë fondet për makinën ruse të luftës, por Fico kritikon ndihmën ushtarake të BE-së.
Fico i ka quajtur vazhdimisht planet e BE-së për të ndaluar rrjedhën e gazit rus si “vetëvrasje” dhe pretendon se ndërprerja e tranzitit do t’i kushtojë Sllovakisë deri në 500 milionë euro në vit.
Sipas marrëveshjes, BE-ja do të pezullojë importet e gazit natyror të lëngshëm rus deri në fund të këtij viti, dhe gazin e importuar nëpërmjet tubacioneve deri më 30 shtator 2027, me një zgjatje të mundshme deri më 1 nëntor 2027 nëse një vend ka vështirësi në mbushjen e kapacitetit të tij të magazinimit me gaz jo-rus përpara dimrit. “Shpresoj që deri në (afatin e ndalimit) lufta të ketë mbaruar dhe të gjithë do të vijmë në vete”, tha Fico.
