Kryetari i Prishtinës, Përparim Rama, ka thënë se institucioni që ai udhëheq do të ofrojë bashkëpunim të plotë me të gjitha organet kompetente, pas arrestimit të tre zyrtarëve nën dyshimin për ryshfet. “Askush mbi ligjin”, ka shkruar ai në Facebook.
Rama ka thënë se Komuna është e hapur për verifikime dhe veprime procedurale.
“Kryeqyteti riafirmon përkushtimin ndaj sundimit të ligjit dhe funksionimit të pavarur të institucioneve të drejtësisë të Republikës së Kosovës. Në lidhje me arrestimin e zyrtarëve të Komunës së Prishtinës, Kryeqyteti do të ofrojë bashkëpunim të plotë me të gjitha organet kompetente, në përputhje me detyrimet ligjore dhe standardet e një shteti demokratik. Në këtë frymë, Kryeqyteti Prishtina mbetet i hapur për çdo proces verifikimi dhe veprim procedural, në frymë bashkëpunimi dhe me respekt të plotë për organet e drejtësisë të Republikës së Kosovës. Askush mbi ligjin!”, ka shkruar Rama.
Sot u arrestuan tre zyrtarë të Komunës së Prishtinës. Ata dyshohen për ryshfet dhe keqpërdorim detyre. Njëri prej tyre u kap në flagrancë duke marrë ryshfet.
