Deputeti i Bundestagut gjerman, Adis Ahmetoviq, mbajti një fjalim në Bundestag, ku foli për ngjarjet në Kosovë në vitin 1999, duke theksuar se shumë mijëra njerëz u bënë viktima të masakrave të regjimit të Sllobodan Millosheviqit.
Ai përmendi se gjatë javëve të fundit të seancave është dëgjuar vazhdimisht, shpesh edhe nga e djathta ekstreme, narrativi se bombardimet e NATO-s në ish-Jugosllavi në vitin 1999 kanë krijuar një precedent.
“Dhe se ky narrativ përdoret vazhdimisht edhe nga grupi juaj parlamentar, edhe sot në një mënyrë shumë të theksuar. Më lini të flas deri në fund! Më lini të flas deri në fund! Në rregull? Më lini të flas deri në fund. Në një pikë të rendit të ditës për debatin mbi situatën e politikës së jashtme të kancelarit federal. Përdorimi i këtij narrativi këtu, për të legjitimuar ndoshta një luftë agresioni të Rusisë kundër Ukrainës që bie ndesh me të drejtën ndërkombëtare dhe shkelje të tjera të së drejtës ndërkombëtare. Dua t’ju them vetëm një gjë: Sa herë që ju e përdorni këtë narrativ, harroni viktimat e Srebrenicës të vitit 1995, sepse nuk pati ndërhyrje humanitare. Sa herë që e përdorni këtë narrativ, harroni mbi të gjitha edhe viktimat në Kosovë. Shumë mijëra njerëz gjithashtu u bënë viktima të masakrave të Millosheviqit. Ajo që nuk ia doli në vitin 1995, fatmirësisht u arrit në vitin 1999 përmes ndërhyrjes humanitare edhe të këtij Bundestagu gjerman, në mënyrë që të mos ndodhte përsëri një gjenocid. Pse e mbroni vazhdimisht në këtë sallë të lartë Millosheviqin dhe diktatorë të tjerë, një narrativ që është kundër demokracisë dhe të drejtave të njeriut dhe jo për viktimat dhe mbi të gjitha për njerëzit në Ballkanin Perëndimor, zoti Palmer”, tha ai.
Për këtë fjalim, Ambasadori i Kosovës në Gjermani, Faruk Ajeti, e ka falënderuar deputetin e Bundestagut, gjerman Adis Ahmetovq. “Faleminderit, i dashur Adis, për qëndrimin tënd të qartë dhe fjalët e tua të drejtpërdrejta”, ka shkruar ai.
