Ish-kryetari i Lidhjes Demokratike të Kosovës (LDK), Isa Mustafa, ka reaguar lidhur me zhvillimet e fundit brenda partisë, pak para mbajtjes së Kuvendit të saj, duke bërë thirrje për maturi, unitet dhe respektim të proceseve demokratike të brendshme.
Mustafa ka theksuar se në LDK problemet nuk mund të zgjidhen përmes tifozllëkut apo propagandës, duke paralajmëruar se qasje të tilla e deformojnë demokracinë dhe rrezikojnë që Kuvendi të shndërrohet në arenë përçarjesh.
Sipas tij, një situatë e tillë nuk i nevojitet LDK-së, e cila, siç ka shkruar në Facebook, ende nuk është shëruar plotësisht nga përçarjet e një Kuvendi të ngjashëm para rreth njëzet vitesh.
Mustafa ka vlerësuar se përgjegjësia për rezultatin zgjedhor është çështje etike dhe trajtohet në organet vendimmarrëse të partisë, e jo përmes deklarimeve të degëve, simpatizantëve apo individëve të caktuar.
“LDK nuk meriton epitafe”, ka shkruar ai, duke shtuar se ‘ata që e duan këtë parti duhet të besojnë në potencialin dhe forcën e saj vetërregulluese për t’u ringritur si subjekt i fuqishëm politik, i cili siguron balancë në ndërtimin demokratik të shtetit të Kosovës’.
Mustafa ka rikujtuar se LDK qëndron mbi çdo emër individual dhe se, përveç kryetarit historik Ibrahim Rugova, ajo nuk identifikohet me asnjë figurë të veçantë.
Sipas tij, Kuvendi, si organi më i lartë i partisë, duhet të garantojë vazhdimësinë e vlerave mbi të cilat është themeluar LDK-ja 36 vite më parë, si parti konservatore e qendrës së djathtë me orientim të palëkundur euroatlantik.
Ai ka theksuar se beteja politike e LDK-së nuk duhet të jetë “ankand”, por ofertë serioze për ndërtimin e një shteti të qëndrueshëm dhe perspektiv. Po ashtu, ka nënvizuar se LDK nuk duhet të shërbejë si platformë për projekte të tjera politike duke u shfrytëzuar emri i saj.
Mustafa ka bërë thirrje për reforma gjithëpërfshirëse, duke theksuar se ato duhet të udhëhiqen nga njerëz besnikë ndaj LDK-së, të hapur ndaj prurjeve të reja dhe angazhimit të të rinjve. Ai ka kundërshtuar ndarjet brenda partisë dhe ka theksuar se përgjegjësia duhet të trajtohet si standard normal i etikës demokratike, ku rezultati ka pasojë.
“Kuvendi duhet të gjejë zgjidhjen më të mirë për rritjen, progresin dhe unitetin e LDK-së, sepse në këtë parti askush nuk është i tepërt,” ka shkruar Mustafa në Facebook.
