Qendra Kombëtare për Menaxhim Kufitar ka njoftuar se nga ora 20:00 e kësaj të enjte është normalizuar qarkullimi i kamionëve si në hyrje dhe dalje edhe në Republikën e Maqedonisë së Veriut.
Më herët gjatë ditës kjo qendër kishte njoftuar se kishin filluar lëvizjet e kamionëve në drejtim të Malit të Zi, pasi që është hequr bllokada në këtë shtet.
Transportues të mallrave nga disa vende të Ballkanit Perëndimor kishin bllokuar disa pika kufitare për qarkullim të mjeteve të rënda në shenjë proteste kundër pasojave të sistemit të ri digjital të BE-së për hyrje-daljet e kamionëve në hapësirën shengen.
Transportues nga Serbia, Maqedonia e Veriut, Bosnje e Hercegovina dhe Mali i Zi, nga mesdita e 26 janarit kishin bllokuar pikat kufitare për qarkullimin e mallrave drejt zonës shengen të Bashkimit Evropian.
I njohur si EES (Entry/Exit System), ky sistem u vendos në kufijtë e jashtëm të zonës shengen dhe nisi të zbatohej gradualisht më 12 tetor 2025, derisa pritet të jetë plotësisht funksional deri më 10 prill 2026.
Sipas rregullit “90/180 ditë” parashihet që transportuesit nga vendet jashtë shengenit mund të qëndrojnë në këtë zonë maksimumi 90 ditë brenda një periudhe prej 180 ditësh.
