Kryetari i Lidhjes Demokratike të Kosovës, Lumir Abdixhiku pak para nisjes së mbledhjes së kuvendit të jashtëzakonshëm të partisë, tha se fati dhe e ardhmja politike e tij dhe e subjektit që përfaqëson varet nga anëtarësia.
“Unë e kam bërë gjënë më fisnike që mund të bëj, t’ia lë këtë fat anëtarësisë sime. Besoj që anëtarësia jonë është e matur, ka përkushtim për LDK-në, i njeh nevojat e LDK-së dhe do të marrë vendimin pa asnjë presion politik. Pra edhe një herë mirë se vini në demokraci!”, ka deklaruar ai para medieve, i pyetur nëse do të konfirmohet si kryetar partie.
Abdixhiku tha se garanton që kjo mbledhje do të shërbejë që LDK të del më e unifikuar, siç tha ai.
“Ju siguroj gjithë anëtarësinë e LDK-së se nga kjo ditë e ky debat do të dalim edhe më të unifikuar, më të fortë dhe më të gatshëm për të ardhmen e mirë që na pret. Ka debat, ka diskutime, flasim për LDK, të ardhmen e Kosovës me qetësi, maturi dhe në fund me demokraci e përcaktojmë fatin tonë politik”, deklaroi Abixhiku.
I pyetur nga mediat për kritikën e anëtarit të Kryesisë së LDK-së, Driton Selmanaj për mungesën e agjendës së kryesisë, Abdixhiku tha se nuk duhet parë vetëm gabimet teknike.
“Ky është niveli më i lartë demokratik. Mund të gjejmë kritika për gjëra jo të rëndësishme por le të vlerësojmë madhështinë e një partie politike e cila është e gatshme të ballafaqohet me anëtarësinë e vet. Të shohim anët e mira e jo gjithmonë ndonjë lëshim të vogël teknik”, tha ai.
