Në të njëjtin muaj kur anuloi tenderin e rregullt për menaxhimin e mbeturinave, Komuna e Prishtinës, përmes procedurave të negociuara, kontraktoi dy operatorë privatë për ofrimin e këtij shërbimi.
Kontrata e lidhur me negocim ka kapur vlerën prej 950 mijë eurosh. Ajo iu dha grupit të operatorëve ekonomikë “Selmans Network”, të cilët ishin kontraktuar edhe vitin e kaluar nga komuna, si dhe kompanisë “Mardem Group”.
Anulimi i tenderit të rregullt, ku do të mund të aplikonin të gjitha kompanitë e interesuara, dhe lidhja e kontratës përmes procedurës së negociuar me kompani të përzgjedhura nga vetë komuna, është parë me shqetësim nga organizatat monitoruese.
“Tashmë është bërë praktikë jo vetëm nga Komuna e Prishtinës, por edhe nga shumë autoritete të tjera kontraktuese, që nga mosrealizimi i kontratave me procedurë të hapur të krijohen rrethana për nënshkrimin e kontratave me procedurë të negociuar. Një rast i tillë është pikërisht edhe ky aktivitet për menaxhimin e mbeturinave. Aktiviteti i rregullt është anuluar me arsyetimin se Komuna e Prishtinës nuk e ka paraparë në buxhetin e vitit 2026 një vlerë të tillë për menaxhimin e mbeturinave”, tha Arbër Kabashi, hulumtues në Iniciativën për Progres – INPO.
Sipas Kabashit, krahasuar me kontratën që komuna kishte lidhur një vit më parë, sivjet ka pasur edhe rritje të ndjeshme të çmimeve për këtë shërbim.
“Ne si organizatë kemi krahasuar dy kontratat, atë të majit 2025 dhe këtë të vitit 2026, dhe kemi vërejtur se çmimi është dyfishuar. Te njëri lot, në vitin 2025 çmimi për një ton ka qenë 65 euro, ndërsa tani është 171 euro, përkundër faktit se paramasat kanë mbetur të njëjta”, shtoi Kabashi.
Nga Komuna e Prishtinës kanë thënë se angazhimi i operatorëve privatë ka ardhur pas kërkesës së Kompanisë Rajonale të Mbeturinave “Pastrimi”.
“Ka qenë e nevojshme, pasi Kompania ‘Pastrimi’ na ka lajmëruar me shkresë zyrtare në fund të dhjetorit se nuk ka mundësi ta ofrojë shërbimin në tërë kryeqytetin dhe ka kërkuar ndihmën tonë për të ndërhyrë në procesin e mbledhjes së mbeturinave. Ne kemi ndërprerë një kontratë për të cilën nuk kemi pasur mjete të mjaftueshme, në vlerë prej 16 milionë eurosh, dhe kemi lidhur një kontratë prej 950 mijë eurosh. Dallimi është rreth 15 milionë euro”, tha Luftar Braha, drejtor i Shërbimeve Publike.
Braha sqaroi gjithashtu arsyet e rritjes së çmimit për këtë shërbim.
“Indikacionet që kemi janë se ka një rritje diku rreth 10 për qind në çmim. Mund të jetë çështje e inflacionit, mund të lidhet me kohëzgjatjen e kontratës, angazhimin e makinerisë dhe organizimin e operatorëve për një afat më të shkurtër. Nuk është diçka që mund të konsiderohet shqetësuese”, shtoi ai.
Nga Kompania Rajonale e Mbeturinave “Pastrimi” i thanë RTK-së se marrëveshja me operatorët privatë është iniciuar nga Komuna e Prishtinës, si masë mbështetëse.
“Sa i përket kontratës që Komuna e Prishtinës ka lidhur me operatorë privatë, sqarojmë se kjo është një marrëveshje e iniciuar nga Komuna, në kuadër të menaxhimit të përgjithshëm të situatës dhe si masë mbështetëse për trajtimin e mbeturinave. Çdo mbështetje nga Komuna është e mirëseardhur, përderisa nuk ndikon në buxhetin e kompanisë sonë. KRM ‘Pastrimi’ mbetet e përkushtuar në ushtrimin e përgjegjësive të saj ligjore dhe operacionale, duke bashkëpunuar me institucionet përkatëse, me qëllim të garantimit të një shërbimi të qëndrueshëm dhe në interes të qytetarëve”, thuhet në përgjigjen e kompanisë.
Ndërkohë, Qendra e Lëvizjes Vetëvendosje ka dorëzuar ditë më parë në Departamentin e Hetimeve në Polici një kërkesë për inicimin e hetimeve lidhur me këtë kontratë, duke vlerësuar se ajo është në kundërshtim me normat ligjore në fuqi.
