Në Facebook, Jahjaga ka theksuar se gjatë mandatit të saj si presidente e Kosovës nuk ka pasur asnjëherë njohje, takim apo çfarëdo kontakti me Epsteinin.

Sipas saj, çdo pretendim për një lidhje personale apo institucionale është i pavërtetë dhe nuk mbështetet në asnjë fakt.

“Përmendja e emrit tim nga mediat me rastin e dokumenteve të publikuara së fundmi lidhet vetëm me një korrespondencë elektronike të palëve të treta, e cila nuk përbën dhe nuk dëshmon asnjë takim, njohje apo lidhje personale me mua. Emri im askund nuk përmendet në asnjë lloj dokumenti të publikuar”, ka shkruar Jahjaga.

Sipas saj, në emailin në fjalë përmendet presidenti i Kosovës, por pa u specifikuar se për cilin president bëhet fjalë, ndërsa nuk ka asnjë kërkesë për takim në emër të saj apo të ndonjë përfaqësuesi të presidencës.

“Çdo raportim ndryshe është insinuatë dhe mashtrim i opinionit publik”, ka theksuar Jahjaga, duke shtuar se kjo mund të vërehet lehtësisht nga vetë dokumentet e publikuara.