Armë, municion, antiplumb e veshje ushtarake ka gjetur sërish Policia e Kosovës këtë të martë në bodrumin e një ndërtesë në Mitrovicë të Veriut.
Deri te zbulimi i tyre, Policia thotë se erdhi pas informacioneve të qytetarëve , për çka bëjnë të ditur se kanë ndërmarrë veprime të menjëhershme duke i konfiskuar ato.
“ 3 – Armë të gjata, 1 – tytë vazhduese, 1 – Kondak për armë të gjatë, 764 – fishekë të kalibrave të ndryshëm, 14 – karikator, 10 – krehër për fishek, 1 – granatë dore tymuese, 2 – antiplumb ushtarak, 2- jakne ushtarake, 1 – bluzë e uniformes ushtarake, 1 – palë pantallona ushtarak, mbështjellës me material tekstili, shirita ngjitës”, ka treguar policia për armatimin që u gjet në bodrumin e asaj ndërtese në rrugën “Vasilije Ostroshki”, në Mitrovicë të Veriut.
Tutje, policia ka bërë të ditur se lidhur me rastin është njoftuar Prokurori i Shtetit, i cili ka udhëzuar inicimin e rastit për veprën penale: “Mbajtje në pronësi, kontroll ose posedim të paautorizuar të armëve”.
Siç kanë njoftuar në lidhje me këtë rast nuk ka persona të arrestuar, ndërsa rasti mbetet nën hetime.
Policia e Kosovës ka falënderuar qytetarët për bashkëpunimin dhe ndihmën, derisa i ka inkurajuar që çdo rast të dyshimtë apo veprim të kundërligjshëm ta raportojnë në numrin emergjent 192 ose në stacionin më të afërt policor. “Vetëm përmes bashkëpunimit të ndërsjellë mund të sigurojmë një ambient më të sigurt për të gjithë qytetarët, pa dallim”, thotë Policia e Kosovës.
