Dogana e Kosovës, në bashkëpunim me Policinë e Kosovës dhe Drejtorinë Kundër Krimit të Organizuar, ka zhvilluar një operacion kontrolli ndaj një automjeti në pikëkalimin kufitar Qafë Prush, në dalje drejt Republikës së Shqipërisë.
Dogana e Kosovës ka njoftuar se gjatë kontrollit të detajuar të automjetit, autoritetet kanë konstatuar praninë e një arme zjarri pa numër serik, e cila ishte e fshehur në pjesën e brendshme të automjetit. “Po ashtu, janë gjetur dhe sekuestruar rreth 120 copë municion të kalibrave të ndryshëm, si dhe një shumë parash në valutën euro.”, thuhet në njoftim.
Lidhur me rastin, materialet i janë dorëzuar Drejtorisë Kundër Krimit të Organizuar për vazhdimin e hetimeve dhe ndërmarrjen e veprimeve të mëtejme procedurale, në përputhje me legjislacionin në fuqi.
Dogana e Kosovës ka bërë të ditur se do të vazhdojë zbatimin e masave të shtuara të kontrollit, si dhe bashkëpunimin e ngushtë ndërinstitucional, me qëllim parandalimin e veprimtarive të kundërligjshme dhe rritjen e sigurisë kufitare.
