Tash e disa ditë mbeturinat në Ferizaj nuk janë hequr nga kompania “Pastërtia” pasi punëtorët e saj janë futur në grevë. Ata kërkojë përmirësim të kushteve dhe përgjegjësi nga drejtuesit e kompanisë.
Në kompani thonë se nuk kanë asnjë shkresë zyrtare lidhur me kërkesat e punëtorëve dhe se është penguar puna e kryeshefit për çka një punëtor është shoqëruar në polici.
“Ne vetëm po i kërkojmë të drejtat të punës që të pajisen me rroba të punës e doreza, rritjen e pagave dhe të kujdestarisë. Këto janë kushtet e punëtorëve të punës, për të dal me kryerjen e shërbimeve për qytetarët”, thotë Bashkim Danqi, punëtor në kompaninë “Pastërtia”.
“Të enjten më është pamundësuar hyrja në kompani nga një person. Jam detyruar që të thërras institucionet përkatëse në këtë rast policinë, e cila e ka bërë zhbllokimin e hyrjes. Unë kam ardhur në zyrë, ata i kanë bërë punët e veta dhe mbrapa nuk ka pasur kërkesa të tjera, përpos ditën e nesërme ka ndodhur një peticion i nënshkruar nga 63 ose 64 punëtorë të departamentit operativ të cilët kanë parashtruar kërkesat te Bordi dhe jo shkarkimin tim”, ka deklaruar kryeshefi, Basri Syla.
Lidhur me situatën e krijuar, LDK në Ferizaj ka fajësuar krerët e komunës.
“Si pasojë e politizimit të kësaj kompanie është edhe keqmenaxhimi i saj me këtë rast kërkojmë shkarkimin e kryeshefit ekzekutiv të kësaj kompanie. Po ashtu kërkojmë nga fajtori kryesor që në këtë rast është kryetari i komunës, zotëri, Aliu që të bisedojë me sindikalistët dhe të arrin një zgjidhje në mënyrë që sa më parë punëtorët t’i kthehen punës”, ka thënë Besim Haziri.
Në komunë thanë se do të ndërmerren hapa konkret në pajtim me ligjet në rast të mosrealizim të kontratës.
“Hapat që duhet që janë ligjor është komunikimi dhe lidhje me kompanitë e tjera qoftë publike ose private dhe prishja e kontratës ose marrja e licencës dhe të drejtës për operim ndaj KRM ‘Pastërtisë”, ka thënë Lulzim Aliu, nënkryetar i Ferizajt.
Ndërkohë në mbrëmje punëtorët e kompanisë “Pastërtia” u panë duke i mbledhur mbeturinat nga qyteti.
