Ministri i Mbrojtjes, Ejup Maqedonci, ka pritur të mërkurën komandantin e KFOR-it, gjeneralmajorin Ozcan Ulutas.
Maqedonci, në një postim në Facebook, ka thënë se me Ulutas kanë diskutuar për situata e sigurisë në vend dhe intensifikimin e patrullimit kufitar nga ana e KFOR-it pas sulmit të 24 shtatorit në Banjskë.
“Ishte kënaqësi të takoj komandantin e KFOR-it, Gjeneralmajor Ozcan Ulutas. Temë qendrore e takimit ishte situata e sigurisë në vend, intensifikimi i patrullimit kufitar nga ana e trupave të KFOR-it duke marrur për shkas sulmin e 24 shtatorit, e po ashtu rritja e bashkëpunimit me Forcën e Sigurisë së Kosovës në çështje të mbrojtjes”, ka shkruar ai.
Maqedonci po ashtu ka thënë se ruajtja e kufirit do të thotë ngritje e nivelit të sigurisë, mbyllje e rrugëve ilegale dhe luftim i grupeve kriminale nga ana e Policisë së Kosovës.
“Ky bashkëpunim Polici e Kosovës, KFOR, FSK, ofron siguri dhe stabilitet për gjithë qytetarët dhe vendin tonë”, ka shkruar më tej Maqedonci. /Kosovatimes/
