Me rënien e temperaturave gjatë ditëve të fundit, shumë qytetarë kanë kërkuar ndihmë mjekësore si pasojë e gripit sezonal. Madje edhe Instituti Kombëtar i Shëndetësisë Publike të Kosovës ka paraqitur kalimin e pragut epidemik si pasojë e gripit sezonal. Ndërsa ekspertët shëndetësorë apelojnë për vaksinim për mbrojtje nga gripi.
Fidane Berisha, është vetëm njëra nga banoret e Prishtinës, e cila ka ardhur në Qendrën Kryesore Familjare në Prishtinë, për t’u vaksinuar me vaksinën kundër gripit sezonal. Ajo thotë për Radio Kosovën se për herë të parë po vaksinohet me vaksinën kundër gripit.
“Hera e parë që kam ardhur të marr vaksinën kundër gripit sezonal. U kisha rekomanduar të gjithëve që ta marrin këtë vaksinë për arsye se i mbron të gjitha ata që kanë probleme kronike, sëmundje shoqëruese, etj.”, tha ajo.
Ndërsa një qytetare tjetër thotë se vaksinën kundër gripit sezonal e merr që shtatë vjet dhe se i ndihmon shumë për tejkalimin sa më të lehtë të gripit.
“Për çdo vit vaksinohem kundër gripit sezonal në tetor, por sivjet e jam vonuar pak. Megjithatë më mirë pak vonë se hiç, sepse vaksina po më ndihmon ta kaloj gripin më lehtë”, tha ajo.
Mjeku specialist në Qendrën e Mjekësisë Familjare në Prishtinës, Naim Sveçla, ka thënë për Radio Kosovën se vaksinimi kundër gripit sezonal ka filluar që nga tetori. Sveçla thotë se në fillim ka qenë interesimi shumë i madh i qytetarëve, teksa u bëri thirrje të gjithë qytetarëve që të vijnë të vaksinohen, ngase ka mjaftueshëm vaksina.
“Edhe pse jemi në muajin janar në fillim ka qenë interesimi i lartë. Kanë qenë mbi 10 mijë e 500 të vaksinuar. Tash është shpallur gjendje epidemike e gripit. Ka filluar interesim por prapë nuk është i lakmueshëm numri vaksina. Kemi mjaftueshëm në stoqe, ndërsa apeli ynë është që të vijnë e të vaksinohen, nuk është vonë dhe të mbron nga gripi sezonal”, tha Sveçla.
Sipas Instituti Kombëtar i Shëndetësisë Publike të Kosovës, mbi 5 mijë 700 raste me gripin sezonal janë raportuar vetëm në javën e parë të janarit. E ky numër, sipas IKShPK-së, paraqet kalimin e pragut epidemik. Teksa ka treguar edhe për masat më efikase në parandalimin e gripit sezonal, e ku vaksinimi përmendet si faktori më i mirë parandalues. Vaksinat mund të merren në çdo komunë, derisa efekti i vaksinës fillon 1 deri 2 javë pas marrjes së saj.
