Deputeti i Aleancës për Ardhmërinë e Kosovës, ( AAK), Shemsedin Dreshaj, në një konferencë për medie të hënën ka folur lidhur me gjendjen e shëndetësisë në Kosovë. Ai ka thënë se shëndetësia urgjentisht duhet të jetë prioritet i Qeverisë Kurti.
Dreshaj tregoi se kanë filluar mbledhjen e nënshkrimeve për seancë të jashtëzakonshme për shëndetësinë dhe sigurimet shëndetësore.
Ai ka thënë se Kosova vazhdon të jetë ndër vendet e vetme që s’ka sigurim shëndetësor, teksa ka kërkuar të hartohet strategjia për shëndetësi dhe të aprovohet ligji për sigurime shëndetësore.
“Ju kemi ftuar me qëllim që t’ju njoftojmë se ne si Grup Parlamentar i AAK-së, kemi filluar me mbledhjen e nënshkrimeve për një seancë lidhur me sigurimet shëndetësore dhe gjendjen në QKUK. Gjendja është e mjerueshme ku ende po rriten listat e pritjes dhe problemet tjera sikurse infrastruktura e dobët. Po ashtu edhe me ikje të personelit shëndetësor. Pastaj mangësitë tjera në legjislacion. Pa sigurime shëndetësore, si vendi i vetëm që nuk kemi sistem shëndetësor. Urgjent shëndetësia të bëhet prioritet i qeverisë, të hartohet strategjia për shëndetësi dhe të aprovohet ligji për sigurime shëndetësore”, është shprehur deputeti Dreshaj.
