Kryetari i SBAShK-ut Rrahman Jasharaj dhe nënkryetarja Vjollca Shala, janë takuar në ambientet e parlamentit të Kosovës me kryetarin e Komisionit Parlamentar për Arsim, Ardian Gola.
Sipas komunikatës së SBAShK-ut, Jasharaj ka kërkuar organizimin e një takimi mes anëtarëve të Komisionit parlamentar për Arsim dhe përfaqësuesve të sindikatës, në shërbim të ngritjes së cilësisë në arsim.
“Jasharaj i ka shprehur shqetësimet e SBAShK-ut edhe lidhur me ndryshimet që janë bërë në skemën pensionale e që kanë prekur në të drejtat e fituara të punëtorëve të pensionuar arsimor dhe ka lutur z. Gola që të gjej kohë për t’u takuar me përfaqësuesit e SBAShK-ut, që do të ofronin fakte e argumente për çështjen e ngritur”, thuhet në komunikatë.
Kryetari i Komisionit Parlamentar për Arsim, deputeti Ardian Gola ka shprehur gatishmërinë për të realizuar së shpejti takim me përfaqësuesit e SBAShK-ut lidhur me çështjen e ngritur për skemat pensionale dhe për një takim me Komisionin Parlamentar për Arsim. /Kosovatimes/
