Futbollisti i Dukagjinit të Klinës, Theophilus Solomon, nuk ka arritur të luajë futboll të dielën në Klinë.
Nigeriani është arrestuar nga Policia e Kosovës, derisa po përgatitej të aktivizohej në ndeshjen që skuadra e tij po e zhvillonte me Dinamon e Ferizajt.
Zëdhënësi i Policisë, Daut Hoxha e ka konfirmuar rastin për rtklive.com.
Ai ka thënë se futbollisti tashmë është dërguar në mbajtje.
“Mund të ju konfirmoj se një person shtetas i huaj, i kërkuar nga INTERPOL, konkretisht nga Republika e Shqipërisë është arrestuar nga Policia e Kosovës dhe është dërguar në mbajtje për procedura të mëtejme sipas ligjeve në fuqi të Republikës së Kosovës”, është shprehur Hoxha.
Dukagjini nga Klina ka kaluar në çerekfinale të Kupës së Kosovës pasi sot ka mposhtur Dinamon e Ferizajt me rezultat minimal 1-0.
