Ish-drejtori i Shërbimeve Publike në Komunën e Prishtinës, Ilirik Musliu, në një intervistë të dhënë për RTK-në ka thënë se shkarkimi i tij nga kryetari Përparim Rama është politik.
“Ka qenë shokuese dhe për keqardhje për faktin që s’ka të bëjë me performancën. Vendimi ka qenë puro politik, ka qenë mosmarrëveshja për shkak të konsistencës së vendimit tonë për Badovcin. Ne kemi pasur një konsistencë dhe nuk e kemi mbështet. E kemi njoftuar partnerin e koalicionit që ky është qëndrimi jonë”, ka thënë ai në “Info Plus”.
Ai tha që një ditë para shkarkimit është takuar me kryetarin Rama dhe me të është dakorduar për agjendën e muajve shkurt e mars dhe se vendimi i shkarkimit ka qenë i papritshëm.
“Lajmin e kam kuptuar përmes një postimi në Facebook të kryetarit Rama. Për asnjë moment nuk është diskutuar performanca, është krejt e kundërta. Drejtoria e shërbimeve publike ka qenë një prej drejtorive më aktive, këtë e ka thënë kryetari Rama dhe organizatat që kanë bërë përzgjedhjen e drejtorive më të suksesshme”, ka thënë Musliu për RTK-në.
Tutje ai ka kundërshtuar njoftimin publik të Ramës se shkarkimi vjen si pasojë e problemeve me mbeturina.
“Arsyetimi i bërë në postim nuk qëndron për shkak se ka shumë të pavërteta dhe të pasakta brenda saj. Për menaxhimin e mbeturinave ju e dini se përgjegjës është ndërmarrja ‘Pastrimi”, ka thënë Ilirik Musliu.
Rama ka emëruar Bekim Brestovcin si kryetar të ri të drejtorisë së Shërbimeve Publike. Ndërkaq në postimin e tij në Facebook për Murselin kishte thënë se arsyeja e shkarkimit ndërlidhet me gjendjen e kryeqytetit me mbeturinat.
