Posta e Kosovës, përmes Filatelisë së saj, nga sot ka vë në qarkullim postar emisionin e jashtëzakonshëm të pullave postare “15-vjetori i marrëdhënieve diplomatike Japoni-Kosovë”.
“Përmes kësaj pulle postare nderojmë Japoninë, e cila është njëra ndër vendet e para që njohu pavarësinë e Republikës së Kosovës”, thuhet në njoftimin e Postës së Kosovës.
Me vendosjen e marrëdhënieve diplomatike në shkurt të vitit 2009, Republika e Kosovës në korrik të vitit 2010 hapi ambasadën në Tokio, e cila njëkohësisht ishte ambasada e parë e Kosovës në Azi.
Komisioni i Pullës Postare, ka finalizuar përmbajtjen e motivit të pullës postare me përkrahjen e Ministrisë së Ekonomisë, dhe në bashkëpunim me Ambasadën e Japonisë.
“Posta e Kosovës vazhdon t’i promovojë të gjitha ngjarjet që shënojnë zhvillimin e vendit tonë, duke falënderuar dhe nderuar të gjitha vendet mike për përkrahjen e vazhdueshme”, thuhet tutje në njoftim.
