Ministri i Punëve të Jashtme të Serbisë, Ivica Daçiq, ka treguar se SHBA-të po përpiqen të jenë partner kyç i Serbisë, por se kushti për këtë është që Beogradi zyrtar të pajtohet me qëndrimin e tyre për Kosovën, transmeton kosova online.
“Nuk kontestohet që SHBA-të duan që ne të jemi partneri kryesor i tyre, por me kusht që të pajtohemi me qëndrimin e tyre për Kosovën. Na thonë të mos flasim për të kaluarën dhe duhet të themi në rregull. Nëse Vuçiq thotë se nuk do të merremi me Kosovën, do ta njohim, do ta lëmë në OKB dhe do të ishim lider. Dhe populli ynë do të na shante”, tha Daçiq për Kurir TV.
Ai ka thënë se Perëndimi “nuk ka mekanizma” për të bërë presion ndaj kryeministrit të Kosovës Aljbin Kurti dhe se zgjedhjet në Serbi duhet të hetohen.
Ai iu referua edhe marrëdhënieve me opozitën dhe takimeve të tyre me përfaqësuesit evropianë dhe theksoi se një sjellje e tillë e dëmton Serbinë.
“Është e pamundur që dikush të vijë nga Brukseli dhe të thotë se ju kemi sjellë një president apo kryeministër të ri. Jo, fillimisht duhet të fitosh zgjedhjet, jo për të kënaqur Viola von Kramon apo ata që nuk kanë lidhje me Serbinë. Derisa ta kuptojnë këtë, janë larg realitetit dhe do ta dëmtojnë Serbinë. Ata duan që institucionet të paralizohen dhe të mos punojnë. E patë se si u sollën në seancën e parë të Kuvendit ku u verifikuan mandatet”, tha Daçiq.
Ai vlerëson se opozita në Serbi e përkrah Prishtinën me sjellje të tilla.
“Është korrupsioni i Serbisë dhe përkrahja për Kurtin, kështu që të gjitha këto janë tema që nuk janë të reja. Kam marrë pjesë në negociatat me opozitën, i kemi pranuar të gjitha propozimet e tyre. Epo, nuk jam i kënaqur as me rezultatet e zgjedhjeve, ndaj nuk kam kërkuar asnjë hetim”, përfundoi ministri.
