Kryetari i Aleancës për Ardhmërinë e Kosovës, Ramush Haradinaj, me ftesë të Ambasadorit Amerikan, Jeffrey M. Hovenier, ka marrë pjesë në shfaqjen e dokumentarit të nominuar për çmimin Oscar, “20 ditë në Mariupol”.
Haradinaj ka thënë se ky dokumentar pasqyron krimet ruse në Ukrainë.
“Pata nderin të jem i ftuar nga Ambasadori Amerikan në Kosovë, z. Jeffrey M. Hovenier, në shfaqjen e dokumentarit të nominuar për çmimin Oscar, “20 ditë në Mariupol”. Një dokumentar ky që përshkruan krimet ruse ndaj popullatës së qytetit industrial dhe portit të rëndësishëm të Ukrainës, Mariupol”, ka thënë Haradinaj.
Haradinaj ka shtuar se ne si popull që përjetuam të njëjtin agresion, jemi të rreshtuar krah shteteve të lira e demokratike.
“20 ditë të shtetrrethimit të qytetit ukrainas Mariupol, të filmuara nga gazetari Mstyslav Chernov, janë pjesë e një maratone 20 ditëshe të një populli të pafajshëm për t’i shpëtuar vdekjes, të zënë befas nga një luftë e papritur, si dhe e pakuptimtë. Ne si popull që përjetuam të njëjtin agresion, jemi të rreshtuar krah shteteve të lira e demokratike, në mbështetje të popullit ukrainas në luftën e tyre të drejtë mbrojtëse”, është shprehur kreu i AAK-së. /Kosovatimes/
